وفاقی وزیرداخلہ محسن نقوی دا لندن اچ پاسپورٹ اتے نادرا سنٹرز دا دورہ، اوورسیز پاکستانیاں کوں ارجنٹ پاسپورٹ 7 ݙینھ اچ جاری کرݨ دا حکم

لندن۔2جون (اے پی پی):وفاقی وزیرداخلہ محسن نقوی لندن اچ پاسپورٹ اتے نادرا سنٹرز دا دورہ کیتے، انہاں دنیا اچ رہݨ آلے پاکستانیاں کوں پاسپورٹ جاری کرݨ اچ دیر تھیوݨ دا نوٹس گھندے ہوئیں انہاں کوں ارجنٹ پاسپورٹ 7 ݙینھ اچ جاری کرݨ دا حکم ݙتے ۔ وزارت داخلہ توں جاری اعلامیہ موجب وزیر داخلہ آکھیے دیار غیر اچ رہݨ آلے پاکستانیاں کوں نارمل پاسپورٹ 30 ݙینھ اچ جاری تھیسی ،ایں پالیسی دا اطلاق دنیا اچ موجود سارے پاکستانی مشنز تے ہوسی ، فی الوقت اوورسیز پاکستانیاں کوں نارمل پاسپورٹ 4 مہینے جݙاں جو ارجنٹ پاسپورٹ 1.5 مہینے اچ ملدا پیا ہئی ۔محسن نقوی آکھیے پاسپورٹ اچ دیر کہیں صورت برداشت کائنی ، مقررہ مدت دے اندر پاسپورٹ جاری نہ تھیا تاں متعلقہ افسران دے خلاف ایکشن ڳھدا ویسی۔وزیر داخلہ پاسپورٹ دی مقررہ مدت اچ فراہمی یقینی بݨاوݨ سانڳے مانیٹرنگ سیل قائم کرݙتے جیں کوں انہاں دی پی ایس او اے ایس پی شہر بانو ہیڈ کریسن ،اوورسیز پاکستانی مقرر مدت اچ پاسپورٹ نہ ملݨ تے ای میل [email protected] تے رسید منسلک کرتے شکایت درج کرا سڳسن۔ دورے دے موقع تے سنٹرز اچ موجود اوورسیز پاکستانیاں نادرا دی کارکردگی دی تعریف کیتی تے کہیں وی نادرا دے حوالے نال شکایت نی کیتی ۔ وزیرداخلہ چنڳی پرفارمنس تے نادرا سٹاف کوں شاباش ݙتی ۔