لاہور۔4اگست(اے پی پی) وفاقی وزیر صنعت و پیداوار رانا تنویر حسین کشمیریاں نال اظہارِ یکجہتی کریندے آکھیے 5 اگست 2019 ء کوں بھارت دے غیر قانونی اتے یکطرفہ اقدامات دے 5 سال مکمل تھیوݨ دے موقع تے اساں کشمیریاں دے حق خودارادیت دی منصفانہ جدوجہد اچ انہاں دیاں قربانیاں کوں خراج تحسین پیش کریندوں ۔ اے پی پی نال خصوصی ڳالھ مہاڑ اچ انہاں آکھیے بھارت دے 5 اگست دے اقدامات اقوام متحدہ دی سلامتی کونسل دی ٻہوں ساریاں قرارداداں دی خلاف ورزی ہن جنہاں اچ اے آکھیا ڳیا ہئی جو ریاست جموں و کشمیر دے مستقبل دا حتمی فیصلہ کشمیری عوام دی مرضی موجب آزاد ، غیر جانبدارانہ اتے اقوام متحدہ دی زیر نگرانی رائے شماری دے ذریعے کیتا ویسی ۔ انہاں مزید آکھیے کشمیری بھارت دے غیرقانونی اتے غاصبانہ تسلط دے خلاف لازوال قربانیاں ݙیندے پئن بھارت غیر قانونی طور تے مقبوضہ جموں و کشمیر اچ سفاکانہ کارروائیاں نال اقوام متحدہ دی قرارداداں اتے بین الاقوامی قوانین دی خلاف ورزی کریندا پئے جیں توں جنوبی ایشیا ء تے خطے سانڳے سنگین خطرہ ہن۔ انہاں آکھیے اقوام متحدہ دی سلامتی کونسل دی قرارداداں تے کشمیری عوام دی خواہشات موجب جموں وکشمیر دے جھیڑے دا حل خطے اچ پائیدار امن و استحکام یقینی بݨاوݨ دا ھکو رستہ اے
