بلوچستان،موسیٰ خیل اچ مسلح لوکاں23مسافراں کوں قتل کرݙتے، گاݙیاں کوں بھاہ لاݙتی اے ،ایس پی ایوب اچکزئی

کوئٹہ۔ 26 اگست (اے پی پی) بلوچستان دے علاقے موسی ٰخیل اچ مسلح لوکاں 23مسافراں کوں گاݙیاں توں لہا تے فائرنگ کرتے قتل کرݙتے تے موقع واردات توں بھڄ ڳئن ۔ ضلع موسیٰ خیل دے سپرنٹنڈنٹ پولیس (ایس پی) ایوب اچکزئی  موجب واقعہ پنجاب بلوچستان قومی شاہراہ تے راڑا شم دے نیڑے پیش آئے۔  ایس پی شہریاں دی ہلاکتاں دی تصدیق کریندے ݙسائے ایں واقعے اچ 23 لوکاں کوں انھاں دیاں گاݙیاں توں تلے لہا تے قتل کیتا ڳئے ۔ایس پی موسیٰ خیل ایوب اچکزئی میڈیا نال ڳالھ مہاڑ اچ ݙسائے لاشاں مقامی ہسپتال منتقل کرݙتیاں ڳئن ۔ایوب اچکزئی مزید ݙسائے مسلح لوکاں پنجاب توں تعلق رکھݨ آلے 6 لوکاں کوں مسافر بساں توں لاتھا جݙاں جو باقی 17 کوں کولیں دے بھریے ٹرک توں لہا تے تشدد دا نشانہ بݨایا ڳئے تے ول انہاں کوں فائرنگ کرتے قتل کرݙتا ڳئے۔ موسیٰ خیل اچ جیں جاہ تے اے واقعہ تھئے اتھاں مسلح لوکاں بہیمانہ  کارروائی دے بعد  10 توں ودھ گاݙیاں وی ساڑ ݙتن ۔ پولیس دا آکھݨ اے مسلح لوکاں شاہراہ تے ناکے لاتے مسافراں کوں بساں اتے ٹرکاں توں لہا تے شناخت دے بعد قتل کیتے