سکیورٹی فورسز دے بلوچستان دے مختلف علاقیں اچ آپریشنز اچ 21 دہشت گرد جہنم واصل ، فائرنگ دے تبادلے اچ پاک فوج دے 14 جوان شہید تھی ڳئن ،آئی ایس پی آر

راولپنڈی ۔26اگست(اے پی پی) سکیورٹی فورسز دے بلوچستان دے مختلف علاقیں اچ آپریشنز اچ 21 دہشت گرد جہنم واصل تھی ڳئن ،فائرنگ دے تبادلے اچ پاک فوج دے 14 جوان شہید تھئن ۔ آئی ایس پی آر موجب 25 اتے 26 اگست 2024 دی وچلی رات ، دہشت گرداں بلوچستان اچ ٻہوں ساریاں گھناؤنی کارروائیاں کرݨ دی کوشش کیتی ۔ دشمن عناصر دی ہدایت تے کیتی ونڄݨ آلی انھاں بزدلانہ دہشت گردی دیاں کارروائیاں دا مقصد بلوچستان دے پُرامن ماحول اتے ترقی کوں ضیان پڄاوݨ ہئی ، جنھاں اچ خاص طورموسی خیل ، قلات اتے لسیبلہ  اچ نشوم شہریاں کوں نشانہ بݨایا ڳئے ۔ انھاں واقعات دے نتیجے اچ کئی نشوم شہری شہید تھئن ۔ موسیٰ خیل ضلع اچ ، دہشت گرداں رارا شام دے عام علاقے اچ ھک بس کوں روکیے تے بے گناہ شہریاں کوں نشانہ بݨائے جیڑھے بلوچستان اچ اپݨی روزی کماوݨ سانڳے کم کریندے پئے ہن ۔ سیکیورٹی فورسز اتے قانون نافذ کرݨ آلے اداریں وختی کارروائی کرتے دہشت گرداں دے ناپاک عزائم کوں ناکام بݨائے تے جوابی کاروائی اچ 21 دہشت گرداں کوں جہنم واصل کرݙتا جیں توں مقامی آبادی دے تحفظ اتے سیکیورٹی کوں یقینی بݨایا ڳئے ۔ تاں جو انھاں کارروائیاں دے دوران 14 بہادر جوان جنھاں اچ 10سیکیورٹی فورسز دے جوان اتے4 قانون نافذ کرݨ آلے اداریں دے اہلکار شامل ہن، بہادری نال لڑدے شہید تھئن ۔علاقے اچ کلیئرنس آپریشن جاری اے ۔ آئی ایس پی آر آکھیے ݙراوݨیاں تے بزدلانہ کارروائیاں دے منصوبہ سازاں، مجرماں، سہولت کاراں اتے معاونین کوں انصاف دی کچاری اچ گھن آیا ویسی جیڑھے نشوم شہریاں کوں نشانہ بݨیندے پئن ۔ پاکستان دی سیکیورٹی فورسز اتے قانون نافذ کرݨ آلے ادارے قوم نال رل تے بلوچستان دے امن، استحکام اتے ترقی کوں روکݨ دیاں کوششاں ناکام بݨاوݨ سانڳے پرعزم ہن۔ ساݙے بہادر نینگراں دیاں اے قربانیاں ساݙے عزم کوں ٻیا تکڑاکریندن