اساکوں ٹیلی میڈیسن اتے ڈیجیٹل ہیلتھ ریکارڈ جیھاں نوی ٹیکنالوجیز توں فیدہ چاوݨاں چاہیدے، سید یوسف رضا گیلانی

اسلام آباد۔25ستمبر(اے پی پی) چیئرمین سینیٹ سید یوسف رضا گیلانی آکھیے اساکوں ٹیلی میڈیسن اتے ڈیجیٹل ہیلتھ ریکارڈ جیھاں نویں ٹیکنالوجیز توں فیدہ چاوݨاں چاہیدے ، تحقیق ،ترقی ،چنڳے ریگولیٹری فریم اتے کمپنیاں نال بین الاقوامی تعاون ودھاوݨ سانڳے پبلک پرائیویٹ پارٹنرشپ کوں ودھارا ݙیوݨا ہوسی ، فارما سیوٹیکل کمپنیاں دے مسئلے مکاوݨ سانڳے پارلیمنٹ اتے حکومت ہر ممکن تعاون سانڳے تیار اے ، پاکستان دی فارماسیوٹیکل انڈسٹری دا مستقبل روشن اے۔ اے ڳالھ انھاں پاکستان فارما سیو ٹیکل مینوفیکچر ز ایسوسی ایشن دے اہتمام نال تریجھے ایوارڈ دی تقسیم سانڳے منعقدہ سمٹ توں بطور مہمان خصوصی خطاب اچ آکھی اے ۔ چیئرمین سینیٹ آکھیے اڄ پی ای ایس اے ایکسپورٹ ایوارڈز اچ شرکت کرݨ خوشی تے اعزاز دی ڳالھ اے ۔ اے عظیم الشان تقریب پاکستان دے فارماسیوٹیکل شعبہ دی شاندار کارکردگی دا جشن اے۔ انہاں آکھیے ایں کانفرنس اچ اساں انھاں دی نہ صرف شاندار کامیابیاں دا اعتراف بلکہ ایں اہم صنعت دی ترقی سانڳے آپݨا عزم کریندوں ، پی پی ایم اے ملکی اتے عالمی سطح تے پاکستان دے فارماسیوٹیکل دے ودھارے اچ اہم کردار نبھائے۔ سید یوسف رضا گیلانی آکھیے عالمی وبائی بحران بشمول کوویڈ۔ 19  وبائی مرضاں اچ ایندا کردار مثالی رہیے ، پاکستان دی 95 فیصد توں ودھ دوائیں دی لوڑھ مقامی مینوفیکچررز پوری کریندے پئن ، ایں صنعت دا ودھارا ویلھے دی اہم لوڑھ اے۔ اتھاں موجود فارما سیوٹیکل کمپنیاں نہ صرف مارکیٹ لیڈر ہن بلکہ اے ساݙی معاشی ترقی دی مشعل راہ وی ہن،اے کمپنیاں برآمدات اچ چنڳاں ودھارا تے پاکستان دی بہترین صلاحیتاں کوں دنیا اچ اجاگر کریندیاں پئن ، فارماسیوٹیکل سیکٹر ساݙی معیشت دے اہم ستوناں اچوں ھک اے ۔ چیئرمین سینیٹ آکھیے اے شعبہ یورپ، امریکہ اتے ایشیا اتے افریقہ دی ابھردی ہوئی مارکیٹاں تے منڈیاں تئیں آپݨی رسائی ودھیندا پئے ،علاقائی کمپنیاں دے مقابلے اچ پاکستان دی فارماسیوٹیکل انڈسٹری نسبتاً چھوٹی اے لیکن ایندی ترقی یقینی اے، بھارت اپݨے تکڑے فارماسیوٹیکل سیکٹر نال عام دوائیاں دی تیاری اتے برآمدات اچ عالمی سطح تے ٻہوں اڳوں اے ،  2022 اچ بھارت دی دواسازی دی برآمدات دی مالیت 24 بلین ڈالر توں ودھ ہئی ، پاکستان جولائی 2023 توں جون 2024 تئیں 341 ملین ڈالر توں ودھ مالیت دی دواسازی دی مصنوعات برآمد کیتن۔ چھوٹے پیمانے دے باوجود پاکستان دی فارماسیوٹیکل انڈسٹری ترقی کریندی پئی اے ، مقامی کمپنیاں ملٹی نیشنل کارپوریشنز توں مارکیٹ شیئر تکھے گھندیاں ، سستاں دوائیں تے عالمی منگ کوں پورا کرݨ سانڳے جنرک دوائیں تے بائیو سیمیلرز دی تیاری اچ سرمایہ کاری ودھاوݨی ہوسی ، اساں دوائیں دی تیاری سانگے تقریباً 98 فیصد ایکٹو فارماسیوٹیکل چیزاں درآمد کریندوں ایں توں دوائیں دیاں قیمتاں تے بین الاقوامی مارکیٹ اچ صنعت دی مسابقت تے منفی اثر پمدے ،  فارما انڈسٹری دی ترقی سانڳے پوری صلاحیت نال کم کرݨا ہوسی ، مقامی طور تے دستیاب معدنیات اتے جڑی ٻوٹیاں دے استعمال توں مصنوعی مواد اتے حیاتیات دی مقامی تیاری سودھے خام مال دی مقامی پیداوار اچ بہتری گھن آوݨی ہوسی ، بطور چیئرمین سینیٹ، میں تساکوں یقین ݙوینداں اساں ھک سازگار ماحول ودھاوݨ تے تعاون سانڳے پرعزم ہیسے ، پاکستان دی فارماسیوٹیکل انڈسٹری دا مستقبل روشن اے۔ چیئرمین سینیٹ  آکھیے او ڈرگ ریگولیٹری اتھارٹی ، سٹیک ہولڈرز اتے متعلقہ حکام توں زوردی اپیل کریندن جو او فارما سیوٹیکل کمپنیاں نال تعاون کرن میں سارے ایوارڈ جتݨ آلیں کوں دلوں مبارخ ݙینداں ۔ آؤ ایں موقع توں فیدہ چیندے آپݨے عزم دا اعادہ کروں جو ھک روشن، صحت مند اتے زیادہ خوشحال پاکستان سانڳے آپݨی جدوجہد جاری رکھیسوں۔