ادب دے ذریعے معاشرے اچ عدم برداشت کوں ختم کیتا ونڄ سڳدے ،چیئرمین سینیٹ یوسف رضا گیلانی

اسلام آباد۔4اکتوبر(اے پی پی) چیئرمین سینیٹ یوسف رضا گیلانی ڈاکٹر ناصر حسین بخاری دی کتاب گھنڈ کھلائی تقریب توں خطاب کریندے آکھیے ڈاکٹر ناصر حسین بخاری کوں محبت بھری کتاب لکھݨ تے مبارخ ݙینداں ۔ مختصر کہانیاں دا اے مجموعہ قابل تعریف اے۔ سید یوسف رضا گیلانی آکھیے ادب دے ذریعے معاشرے اچ عدم برداشت کوں ختم کیتا ونڄ سڳدے ۔ میں خود ھک کتاب دا مصنف ہاں۔ میں عوام دی خدمت اچ جیل کٹی اے میں غریباں کوں نوکریاں ݙتیاں ،نیب میکوں جیل اچ پاتا ، میکوں ایں تے کوئی افسوس کائنی ۔ آئین پاکستان اچ 63  اے کوں ضیا الحق درج کرایا ہئی۔ ساݙی جماعت جمہوریت دے ودھارے سانڳے جانی قربانیاں ݙتن ۔میں چارٹر آف ڈیموکریسی تےعملدرآمد کروائے تے 58/2 بی کوں اساں ہی ختم کرایا ہئی ملک دی خدمت کرݨ ساݙا فرض تے ترجیح اے عوامی خدمت سانڳے اساکوں جیلاں توں ݙر نی لڳدا ۔ چیئرمین سینیٹ آکھیے جیں جج میکوں نااہل کیتا ہئی ، میکوں اوں فون کیتا جو تساں میڈی دھی دی شادی تے آوݨے میں آکھیا دھیریں ساریں دیاں سانجھیاں ہوندن تے میں شرکت وی کیتی ، ساݙا جیں خاندان توں تعلق اے انھاں دا کم سیاست کائنی تبلیغ اتے امن دا پیغام ݙیوݨ اے ۔سید یوسف رضا گیلانی کتاب دی گھنڈ کھلائی دے سلسلے اچ آکھیے علم و ادب دی اہمیت کوں کہیں وی دور اچ کم یا نظر انداز نی کیتا ونڄ سڳدا ۔ علم وادب دے ذریعے ہی اساں زندگی دی مشکلات اتے آزمائشاں دا مقابلہ کیتا ویندے تے علم وادب ساݙی تاریخ دا ریکارڈ ہوندے اے انسانی تجربے دے تنوع دی عکاسی کریندے ۔  چیئرمین سینیٹ آکھیے کہانیاں، شاعری اتے نثر دے ذریعے ہی اساں آپݨی شناخت کوں محفوظ اتے تبدیلی کوں اڳوں ودھیندوں ادب ہی اساکوں آپݨے آسے پاسے دی دنیا دا احساس ݙیواوݨ اچ مدد کریندے ،بہتر مستقبل دی تعمیر سانڳے اعلیٰ تعلیم ناگزیر اے۔چیئرمین سینیٹ سید یوسف رضا گیلانی ڈاکٹر ناصر حسین بخاری دی ادبی و غیر معمولی تحریری ذہانت کوں خراج تحسین پیش کیتا اتے ڈاکٹر ناصر حسین بخاری کوں شاندار کامیابی تے دلوں مبارخ ݙتی ۔سید یوسف رضا گیلانی آکھیے فاونڈیشن فار ایجوکیشن، انٹرپرینیورشپ، اینڈ لٹریچر (ایف ای ای ایل) دا ایں شاندار تقریب سانڳے دلوں شکریہ ادا کرینداں ، انھاں فائونڈیشن دی طرفوں نینگر نسل سانڳے خدمات کوں خراج تحسین پیش کیتا۔ یوسف رضا گیلانی آکھیےڈاکٹر ناصر کتاباں دی رائلٹی تے ڳالھ کیتی اے تے میں تساکوں یقین ݙوینداں جو میں ذاتی طور تے ایں معاملے کوں ݙیکھساں ۔چیئرمین سینٹ سید یوسف رضا گیلانی  آکھیے مصنفین دے حقوق دے تحفظ سانڳے ایں مناسب فورم تے چیساں