اسلام آباد۔23اکتوبر(اے پی پی)اردو اتے سرائیکی دے مہاندرے ناول نگار اتے ادیب ڈاکٹراسلم انصاری دیاں یاداں سانڄھیاں کریندے ملتان دے معروف صحافی، لکھاری اتے ادیب رضی الدین رضی آکھیے جو کجھ لوک اینجھے ہوندن جنہاں دے ہووݨ توں اساں خود کوں معتبر سمجھدوں، او مسلسل کم کریندن، انتھک محنت کریندن، او آپݨی محنت دے ٻل بوتے تے اڳوں ودھدن اتے آپݨی شہرت سانڳے کہیں ادبی مرکز دے محتاج کائنی ہوندے ۔کہیں وݙے شہر اچ ہجرت کرݨ دی ۔ ایجھی ہی ھک ہستی ساݙے ملتان وچ ہئی جیں ساݙے ملتان کوں ملتانِ معلی بݨا ݙتا ۔ 30 اپریل 1939 اچ پاک گیٹ دے محلہ بھیتی سرائے اچ ڄمݨ آلے اسلم انصاری اورئینٹل کالج لاہور توں اردو تے بعد اچ زکریا یونیورسٹی ملتان توں فارسی اچ ایم اے کیتا ۔لاہور اچ رہݨ دے دوران انھاں ناصر کاظمی ، احمد ندیم قاسمی ، خواجہ محمد زکریا ڈاکٹر سید عبداللہ سودھے ایں زمانے دیاں نامور شخصیات دی رفاقت نصیب تھئی ۔ اے 1960 توں 1962 دا زمانہ ہئی تے اسلم انصاری اوں زمانے اچ کالج دے مشاعریں اچ ٹرافیاں جیت تے آپݨی صلاحیتاں منوا چکے ہن۔ رضی الدین رضی آپدیاں یاداں سانجھیاں کریندے آکھیا جو ڈاکٹر اسلم انصاری کوں بعد اچ کئی واری اے احساس تھیا جو انھاں ایں امید دا وی اظہار کیتے جے او ملتان واپس نہ آندے تاں انھاں دا شمار وی شاید انھاں شخصیات اچ ہوندا جیڑھے ادبی مراکز دی وجہ توں معتبر ٹھہرن پر ول ایں ڳالھ تے وی اطمینان کریندے ہن جو انھاں ملتان اچ رہ تے دنیا اچ خود کوں منوائے ۔ او ملتان اچ رہیے تے ملتان دی سنڄاݨ بݨیے ۔ تے ہنڑ اساں اڄ ھک تہذیبی شخصیت توں محروم تھی ڳیوں تے ھک ایجھی شخصیت جیں کوں اردو ، فارسی ‘سرائیکی لکھنڑ سانڳے پسند کیتا گیا تے ناول ” بیڑی اچ دریا ” کوں سرائیکی تے غزل کیتے اردو کوں اظہار دا ذریعہ بݨایا۔اسلم انصاری نال میڈا پہلا تعارف 1980 اچ تھیا ہئی جݙاں میں پہلی واری غلام عباس دی آواز اچ انھاں دی او غزل سݨی جیں مقبولیت دے سارے ریکارڈ بھن ݙتے ۔ ول ایہا غزل استاد غلام عباس دی سنڄاݨ بݨی تے غلام عباس ھک واری ول اساکوں ݙسایا جو اے غزل ریڈیو پاکستان دی ساریں توں ودھ سݨی ونڄݨ آلی غزلاں اچوں ھک اے جݙاں میں پہلی واری اے غزل سݨی تاں میکوں پتہ نہ ہئی جو غزل دے گائیک تے شاعر ݙوہیں دا تعلق میݙے ملتان شہر توں اے ول کالج دازمانہ آیا اتے ساݙیاں ملاقاتاں تھیاں ۔ وکھو وکھ اخباراں اچ کم وچال انھاں دا کئی واری انٹرویو کیتا ۔ یاداں دا ھک نہ مکنڑ آلہ سلسلہ اے ۔ اہل قلم کانفرنس اچ شرکت سانڳے ھک سفر اے سارا کجھ زندگی دا ایجھا سوہݨا اثاثہ اے جیں تے ماݨ کراں گھٹ اے۔انصاری صاحب ںال ساݙی بے تکلفی وی رہی اتے انھاں قدم قدم تے ساݙی حوصلہ افزائی وی کیتی ۔ سال 2000 اچ میݙا شعری مجموعہ ستارے مل نی سڳدے شائع تھیا تاں پذیرائی سانڳے تعارفی تقریب اچ اقبال ساغر صدیقی اتے عاصی کرنالی دے رلے ڈاکٹر اسلم انصاری وی موجود ہن۔ انصاری صاحب کݙاہیں مایوس نہ کریندے ہن۔ رضی الدین رضی دا بیا آکھنڑ ہئی جو اسلم انصاری کوں ٻہوں محبتاں ملیاں تے ایندے نتیجے اچ او نرگسیت دا وی شکار تھئے تے ایں نرگسیت وی انہاں تقریباں تے ہجوم توں پرے رکھیا ۔ ناصر کاظمی نال انھاں دی یاری تے انھاں دی ملتان واپسی تے ناصر کاظمی دی غزل
’’وہ شخص تو شہر ہی چھوڑ گیا میں بال بناؤں کس کے لیے ‘‘تاریخ دا حصہ اے ۔
انھاں دے فن دی کئی جہتاں ہن ۔اقبالیات تے ھک توں ودھ ہک کتاب توں علاوہ خواجہ غلام فرید دیاں کافیاں دا انگریزی اچ ترجمہ کیتا۔ آپݨی کتاب ملتان شہر طلسمات اچ انھاں ملتان کوں ٻہوں سوہݨے انداز اچ محفوظ کیتا ۔ او ایں شہر دی تریخ دے ایجھے گوشے سامݨے گھن آئے جیڑھے ایں توں پہلے اوجھل ہن ۔ ملتان آرٹس کونسل دے ڈائریکٹر دی حیثیت نال کم کیتا جݙاں اے ثقافتی مرکز ابتدائی مرحلے اچ ہئی تے ایندے خدوخال کوں ترتیب ݙتااتے ایجھی تکڑی بنیاد رکھی جو اے ادارہ ہݨ ھک وݙے ثقافتی مرکز دے طور تے سنڄاتا ویندے۔
انھاں اوکھے موضوعات تے وی قلم چاتا ۔ ادب اچ سیر افلاک دی روایت ایجھا مضمون پڑھیا تےحیران رہ ڳیا جو انھاں کیجھے سوہنڑپ نال ایں موضوع دا احاطہ کیتے۔۔
اتے اڄ اساں ملتان دے ایں سپوت کوں ٻہوں شان نال رخصت کیتا اے۔
