اسلام آباد۔4مارچ (اے پی پی) وزیرِ اعظم محمد شہباز شریف پاکستان اتے آذربائیجان وچال مفاہمتی یادداشتاں تے معاہدیاں کوں عملہ جامہ پواوݨ دی ہدایت کریندیں ہوئیں آذربائیجان دے صدر ولوں پاکستان اچ 2 ارب ڈالر دی سرمایہ کاری دے اعلان بارے نائب وزیرِ اعظم تے وزیرِ خارجہ اسحاق ڈار دی نگرانی اچ کمیٹی ٻݨا ݙتی اے۔ منگل کوں وزیراعظم آفس دے میڈیا ونگ توں جاری بیان موجب منگل کوں وزیراعظم دی صدارت اچ اڄوکے دورہ آذربائیجان تے جائزہ اجلاس تھیا۔ اجلاس اچ نائب وزیرِ اعظم تے وزیرِ خارجہ اسحاق ڈار، وفاقی وزرا احد خان چیمہ، جام کمال خان، عبدالعلیم خان، ڈاکٹر مصدق ملک، معاون خصوصی طارق فاطمی اتے متعلقہ اعلیٰ حکام شریک تھیے۔ اجلاس اچ وزیراعظم دورہ اچ دستخط تھئی مفاہمتی یادداشتاں تے معاہدیاں کوں عملی جامہ پواوݨ دی ہدایت کیتی۔ وزیراعظم وزارت تجارت کوں پاکستان اتے آذربائیجان وچال اڄوکی تجارت دے حجم کوں ݙو ارب ڈالر تئیں پڄاوݨ دی ہدایت کیتی۔ وزیرِ اعظم آذربائیجان دے صدر ولوں پاکستان اچ ݙو ا رب ڈالر دی سرمایہ کاری دے اعلان بارے نائب وزیرِ اعظم تے وزیرِ خارجہ اسحاق ڈار دی نگرانی اچ کمیٹی ٻݨا ݙتی۔ کمیٹی توانائی تے بنیادی ڈھانچے دے شعبیاں اچ معاہدیاں کیتے تیاری یقینی ٻݨیسی۔ وزیرِ اعظم آذربائیجان دے صدر دے آندے متوقع دورے پاکستان توں پہلے ترجیحی بنیاداں تے ساری تیاریاں پوری کرݨ دی ہدایت کیتی۔ وزیراعظم آکھیا جو پاکستان اتے وسط ایشیائی ریاستاں وچال تجارت تے سرمایہ کاری دی استعداد توں فیدہ چاوݨ کیتے ترجیحی بنیاداں تے کم کریندے پئیوں۔ اجلاس اچ وزیراعظم کوں باکو اچ تھیوݨ آلے سانجھے بزنس فورم بارے ݙسیا جو فورم اچ 83 پاکستانی جڈانجو آذربائیجان دی 101 کمپنیاں شریک تھین۔
