اسلام آباد۔4مارچ(اے پی پی)وزیراعظم محمد شہباز شریف 2029ء تئیں ملکی برآمدات 60 ارب ڈالر تئیں ودھاوݨ، 2035ء وژن سانڳے ملک کوں ہک ٹریلین دی معیشت ٻݨاوݨ دا عزم ݙکھیندے آکھیے جو قرضیاں توں ملک دی جان چھڑویسوں، ہک ٻئے دیاں ڄنڳھاں چھکݨ دی بجائے ملکی ترقی کیتے کم کرݨا ہوسی۔ اے ڳالھ انہاں اسلام آباد اچ وفاقی کابینہ دے خصوصی اجلاس نال الیندے آکھی۔ تاریخ اچ پہلی واری کابینہ دے خصوصی اجلاس دی کارروائی نشر اتے کابینہ دی ہک سال دی کارکردگی عوام دے اڳو پیش کیتی گئی۔ اجلاس اچ متعلقہ وزراء اپݨی اپݨی وزارت اتے ٻئے شعبیاں دی ہک سالہ کارکردگی تے رپورٹ پیش کیتی۔ خصوصی اجلاس اچ مختلف شعبیاں خاص کر کاروباری حضرات، چیمبرز دے نمائندگان، صحافیاں، خواتین، طالب علماں اتے شہریاں کوں سݙیا ڳیا جو او اجلاس ݙیکھن اتے پچھلے ہک سال دے حکومتی اقدامات اتے مستقبل دے لائحہ عمل نال سنڄاݨ کرن۔ وزیر اعظم آکھیا جو اساں 9 مئی آلے نئیں 28 مئی آلے ہیں، اڄوکی حکومت دی ہک سالہ مدت اچ برآمدات، ترسیلات زر اتے زرمبادلہ دے ذخائر ودھین، مہنگائی دی شرح 28 فیصد توں 1.6 فیصد تے آ گئی اے، حکومت دے خلاف کرپشن دا ہک وی کیس کائنی، مثبت معاشی اشاریاں دا عالمی ادارے وی اعتراف کریندن، رمضان پیکیج دے تحت 40 لکھ خانداناں کوں پنڄ، پنڄ ہزار روپے ݙیسوں، غزہ اچ جنگ بندی دے باوجود امداد و خوراک بند کرݨ توں وݙا ٻیا کوئی ظلم نئیں تھی سڳدا، ، انشاء ﷲ رمضان المبارک دی برکات نال کشمیری و فلسطینی عوام کوں انہاں دا حق تیکھے ملسی۔ انہاں آکھیا جو اساں نا صرف ملک کوں ݙیوالہ تھیوݨ توں بچائے ٻھل آئی ایم ایف، ورلڈ بینک اتے سارے عالمی ادارے آہدے پین جو پاکستان دے میکرو اقتصادی اشاریے استحکام دو ویندے پن اتے معیشت ترقی کریندی پئی اے، ایں کامیابی تے سارے اتحادیاں دی حمایت تے مشکور ہیں جو اساں ہر اوکھ پار کیتے اتے ملکی تاریخ اچ پہلی واری مکمل یکسوئی نال کہیں ذاتی ایجنڈا توں ہٹ تے سارے ادارے کٹھے تھی تے ملکی ترقی کیتے کم کریندے پن، دوست ملکاں سعودی عرب، یو اے ای وغیرہ وی ہتھ ونݙائے اتے آرمی چیف جنرل سید عاصم منیر وی معاشی بہتری کیتے بھرپور کردار ادا کیتے، ترقی و خوشحالی اچ ودھ تیزی آسی اتے پاکستان “اڑان پاکستان” ٻݨسی اتے ملک توں خوارج دا مکمل خاتمہ تھیسی، پہلے دہشتگردی مک ڳئی ہئی ول ہر کہیں کوں پتا اے جو کیویں دہشت گردی ولا سر چاتے، او کون ہا جیڑھا ولا دہشتگردی ڳھن آئے؟ دہشت گردی مکائے بغیر ترقی و خوشحالی دا سفر جاری نئیں رہ سڳدا، پاکستان کوں ڄڳ اچ اونڄی ولا اچی ڄاہ تے ڳھن ویسوں۔ انہاں آکھیا ڄیکر اساں ترقی کرݨی اے تاں ݙینھ رات محنت کرݨی ہوسی، 2029 اچ موجودہ حکومت اپݨی مدت پوری کریسی تاں پاکستان اپݨے پیراں تے کھڑا تھی چکیا ہوسی، پاکستان ہک عظیم ملک ٻݨسی۔ کابینہ نال نائب وزیراعظم و وزیر خارجہ محمد اسحاق ڈار، وزیر خزانہ و محصولات محمد اورنگزیب وی خطاب کیتے اتے حکومت دی کارکردگی، معاشی اتے اقتصادی چیلنجز و اقدامات تے الایا۔ کابینہ نال وزیر دفاع خواجہ محمد آصف، وفاقی وزیر منصوبہ بندی و ترقی احسن اقبال، وفاقی وزیر توانائی اویس احمد خان لغاری، وفاقی وزیر برائے آئی ٹی و ٹیلی کمیونیکیشن شزہ فاطمہ خواجہ وی الائے۔
