نائب وزیراعظم اسحاق ڈار دی صدارت اچ کابینہ کمیٹی دا اجلاس

اسلام آباد۔5مارچ(اے پی پی) نائب وزیراعظم اتے وزیر خارجہ سینیٹر محمد اسحاق ڈار دی صدارت اچ کابینہ کمیٹی ضروری فصلاں دا اہم اجلاس تھئے۔ ۔ نائب وزیراعظم دے دفتر توں جاری بیان موجب وزارت نیشنل فوڈ سیکیورٹی اینڈ ریسرچ ٹیم دی قیادت وفاقی وزیر رانا تنویرحسین اتے وفاقی سیکرٹری وسیم اجمل چوہدری کیتی ۔ اجلاس اچ کابینہ کمیٹی دی کݨک پالیسی برائے ربیع 2024-25 دی رپورٹ پیش کیتی ڳئی تے کݨک دی متوقع پیداوار تے قومی ضرورتاں دا تفصیلی جائزہ ڳھدا ڳئے۔وفاقی وزیر نیشنل فوڈ سیکیورٹی اینڈ ریسرچ رانا تنویر حسین کمیٹی کوں اڄوکے سال دے زیر کاشت رقبہ بارے بریفنگ ݙتی تے زرعی حکمت عملیاں کوں گھریلو ضرورتاں تے کساناں دے فیدے نال ہم آہنگ کرݨ دی اہمیت تے زور ݙتا۔ کمیٹی فی ایکڑ پیداوارتے مجموعی زرعی پیداواری صلاحیت ودھاوݨ سانڳے وفاقی تے صوبائی زرعی تحقیقی نظام کوں ہم آہنگ کرݨ تے ڳالھ مہاڑ کیتی ۔ نائب وزیراعظم محمد اسحاق ڈار صوبائی حکومتاں نال مشاورت دی اہمیت تے زور ݙتے تاں جو ایں ڳالھ کوں یقینی بݨایا ونڄ سڳے جو پالیسیاں کساناں کوں فیدہ پڄاون تے شعبہ جاتی استحکام اچ کردار نبھاون ۔ اجلاس اچ کݨک دی امدادی قیمت دے تعین تے وی غور کیتا ڳئے تاں جو کساناں سانڳے منصفانہ قیمتاں کوں محفوظ بݨایا ونڄ سڳے تے مارکیٹ اچ استحکام برقرار رکھیا ونڄ سڳے۔ نائب وزیراعظم وزیر خزانہ کوں ہدایت کیتی جو او پالیسی فریم ورک کوں چنڳاں تے تکڑا بݨاوݨ سانڳے زرعی پالیسی کمیٹی دے مباحثیں اچ اہم بحث دے نکتے کوں شامل کروں ۔ اجلاس اصلاحی اقدامات دے ذریعے زرعی معیشت کوں مستحکم کرݨ، غذائی تحفظ کوں یقینی بݨاوݨ تے کاشتکاری دے شعبے اچ ترقی کوں ودھارا ݙیوݨ دے حکومتی عزم دا اعادہ کیتے۔ بیان موجب قومی غذائی تحفظ اتے تحقیق دی وزارت وݙی مدت استحکام اتے ترقی سانڳے پائیدار پالیسیاں اتے اسٹریٹجک مداخلتاں دے ذریعے غذائی تحفظ کوں یقینی بݨاوݨ، کساناں دی مدد کرݨ اتے زراعت کوں تکڑا بݨاوݨ سانڳے پرعزم اے۔بیان موجب وزارت نیشنل فوڈ سیکیورٹی اینڈ ریسرچ لمبی مدتی استحکام تے ترقی سانڳے پائیدارپالیسیاں دے ذریعے غذائی تحفظ کوں یقینی بݨاوݨ، کساناں دی مدد اتے زراعت کوں تکڑا بݨاوݨ سانڳے پرعزم اے