اسلام آباد۔5مارچ (اے پی پی) وفاقی وزیر برائے منصوبہ بندی، ترقی تے خصوصی اقدامات احسن اقبال آکھیا جو پاکستان دی معیشت دی ترقی دا دار و مدار نجی شعبے دی قیادت اچ اقتصادی بہتری اتے مہارتاں دے فروغ تے اے۔ سی او ٹی ایچ ایم گلوبل کانوکیشن توں خطاب کریندیں ہوئیں آکھیا جو پاکستان کوں آپݨی افرادی قوت کوں جدید عالمی معیشت دے تقاضیاں نال جوڑݨا پوسی اتے نجی شعبے کوں سرمایہ کاری، کاروباری وسعت اتے اقتصادی ترقی اچ مرکزی کردار ادا کرݨا پوسی۔ انہاں آکھیا جو کوئی وی ملک نجی شعبے دی شمولیت اتے ہنرمند افرادی قوت دے بغیر پائیدار ترقی نی ڳھن سڳدا۔ پاکستان کوں درپیش معاشی چیلنجز ہک نویں طرز فکر منڳدے۔ جتھ حکومت کاروبار دوست ماحول ݙیوے۔ انہاں آکھیاجو پاکستان بے پناہ صلاحیتاں نال مالا مال اے۔ احسن اقبال آکھیا جو پاکستان سیاحت اتے ہاسپٹلٹی دے شعبے اچ تیزی نال ترقی کریندا پئے۔ ایں ترقی کوں ٻیا موثر ٻݨاوݨ کیتے انسانی وسائل اتے ڈیجیٹل کنیکٹیویٹی اچ سرمایہ کاری ضروری اے۔ انہاں آکھیا جو ’’اڑان پاکستان‘‘ ملکی معیشت دی ترقی دا ہک واضح روڈمیپ فراہم کریندے جئیں دا ہدف 2047 تئیں پاکستان کوں 3 کھرب ڈالر دی معیشت اچ تبدیل کرݨے۔ احسن اقبال آکھیا جو پاکستانی پیشہ ور افراد پہلے ای عالمی ہاسپٹلٹی اتے سروس انڈسٹری اچ آپݨی مہارت دا لوہا منوا ڳئے۔
