حکومت ملک اچ کاروباری سرگرماں اتے سرمایہ کاری کیتے سازگار ماحول ݙیندی پئی اے، وزیراعظم محمد شہباز شریف دی ممتاز کاروباری شخصیات نال ملاقات اچ ڳالھ مہاڑ

اسلام آباد۔7مارچ (اے پی پی) وزیراعظم محمد شہباز شریف ملک اچ سرمایہ کاری اتے کاروباری سرگرمیاں دے فروغ کیتے سازگار ماحول ݙیوݨ دا عزم کریندیں ہوئیں آکھیا جو زراعت، صنعتی ترقی اتے تجارت ودھاوݨ حکومت دا ہدف اے۔ آندے خمیس توں شعبہ جاتی اصلاحات اجلاس باقاعدگی نال تھیسی۔ کساناں دے محنت اتے ویلیو ایڈیشن پاروں چاول دی برآمدات چار ارب ڈالر تئیں پڄ ڳئن۔ میکرو اقتصادی اشاریے بتدریج بہتر تھیندے پئن۔ حکومت اچ جتھ جئیں دی غلطی ہوسی اونکوں جواب ݙیوݨا پوسی۔ اے ڳالھیں انہاں جمعے کوں ممتاز کاروباری شخصیات نال ملاقات اچ ڳالھ مہاڑ کریندیں ہوئیں آکھی۔ وفد اچ گوہر اعجاز، سید یاور علی، عاطف شیخ، فواد مختار، شاہد حسین، ایس ایم تنویر، میاں احسن، سلیم غوری، شہزاد ملک، عثمان ملک، عاطف انعام اتے شہزاد اصغر شریک ہن۔ اجلاس اچ وفاقی وزراء احسن اقبال، رانا تنویر حسین، احد خان چیمہ، جام کمال خان، محمد اورنگزیب، عطاء اللہ تارڑ، علی پرویز ملک، حنیف عباسی، وزیرِ مملکت بلال اظہر کیانی، معاون خصوصی ہارون اختر، وزیراعظم دے کوآرڈینیٹر رانا احسان افضل، چیئرمین ایف بی آر راشد محمود لنگڑیال اتے متعلقہ اعلیٰ حکام وی شریک تھیے۔ وزیراعظم آکھیا جو ملکی ترقی خوشحالی پیداوار اتے روزگار دے موقع ودھاوݨ اچ کاروباری برادری دا کردار قابل تعریف اے۔ انہاں آکھیا جو الحمداللہ ملکی معیشت سدھے پاسے ویندی پئی اے۔ شرح سود اتے مہانگ دی شرح ڳھٹ ڳئی اے۔ انہاں آکھیا جو حکومت ملک اچ کاروباری سرگرماں اتے سرمایہ کاری کیتے سازگار ماحول ݙیندی پئی اے۔ زرعی اتے صنعتی ترقی، تجارت دی بہتری اساݙا ہدف اے۔ وزیراعظم آکھیا جو حکومت کاروباری شعبے نال سانجھ چاہندی اے تانجو معیشت دا پھیتا تکھے گھمدا رہے۔ ایں کیتے کاروباری برادری نال اقدامات کریسوں۔ وزیراعظم آکھیا جو آندے خمیس توں ہر شعبے دا اجلاس میݙے دفتر اچ تھیسی۔ اجلاس اچ متعلقہ وزراء، سیکرٹریز اتے متعلقہ شعبے دے چار بندے شریک تھیسن۔ شعبہ جاتی جائزہ اجلاس ہفتے اچ ݙو واری تھیسی۔ آندے خمیس کوں تھیوݨ آلے پہلے اجلاس اچ زرعی شعبے دی کارکردگی دا جائزہ ڳھدا ویسی۔ شرکاء ملک اچ زراعت دی ترقی کیتے معیاری ٻج دی فراہمی بارے نیشنل سیڈ ڈویلپمنٹ اتھارٹی ٻݨاوݨ تے حکومت کوں خراج تحسین پیش کیتا۔ شرکاء حکومت دے گرین پاکستان انیشی ایٹو دی وی تعریف کیتی۔