سینیٹ اچ تریمتاں دے جگ ݙیھاڑ تے تریمتاں تے تشدد، کم دی جاہ تے ہراسگی روکݨ تے انہاں کوں با اختیار بݨاوݨ دی قرارداد منظور

اسلام آباد۔8مارچ(اے پی پی) سینیٹ تریمتاں دے جگ ݙیھاڑ تے ھک قرارداد متفقہ طور تے مںظور کیتی اے جیں اچ تریمتاں تے تشدد، کم دی جاہ تے ہراسگی روکݨ تے انہاں کوں بااختیار بݨاوݨ سانڳے مختلف شعبیں اچ انہاں دی بھرپور تے فعال شمولیت یقینی بݨاوݨ تے زور ݙتا ڳئے ۔ سینیٹ دے اجلاس اچ سینیٹر شیری رحمان تریمتاں دے جگ ݙیھاڑ تے اے قرارداد ایوان اچ پیش کیتی۔ قرارداد اچ مختلف شعبیں اچ تریمتاں دی خدمات دا اعتراف کریندے آکھیا ڳئے تریمتاں کوں سیاسی سماجی سودھے ٻئے شعبیں اچ مختلف مسئلیں دا سامݨا اے جئیں توں انہاں دے  مختلف شعبیں اچ شمولیت اتے کارکردگی تے اثرات پوندن ۔ صنفی امتیاز مکاوݨ سانڳے مزید اقدامات کرݨ دی لوڑھ اے۔ حکومت کوں تریمتاں دی معاشی شمولیت یقینی بݨاوݨ سانڳے موثر اقدامات کرݨے چاہیدن ایں توں انہاں کوں مالی طور تے بااختیار بݨاوݨ اچ مدد ملسی ، انہاں کوں کاروباری وسائل گھنݨ تے پائیدار معاشی موقع ݙیوݨ دی لوڑھ اے ۔ قرارداد اچ اے وی آکھیا ڳئے جو تریمتاں دی نکی عمر اچ شادی نی تھیوݨی چاہیدی ، تریمتاں اچ صحت متعلق اگاہی کیتے ہیلتھ کیئر پالیسیاں دے ذریعے اصلاحات کیتیاں ونڄن تے صحت دیاں سہولتاں ݙیوݨ یقینی بݨائیاں ونڄن ۔ تریمتاں دے انہاں دے حقوق تئیں رسائی اتے انہاں دے حقوق متعلق آگاہی اتے تریمتاں دے خلاف سیاسی امتیاز سودھے جرم دی وختی پراسکیوشن کیتی ونڄے ۔صنف دی بنیاد تے تشدد اتے کم دی جاہ تے تریمتاں کوں ہراساں کرݨ دے خلاف جامع اقدامات کیتے ونڄن ۔ قرارداد اچ آکھیا ڳئے جو تریمتاں کوں عزت دے ناں تے قتل کرݨ تے تعزیرات پاکستان موجب سزا ݙتی ونڄے ، ملازمت پیشہ تریمتاں کوں برابر تنخواہیں ݙیاں ونڄن ۔تریمتاں کوں فیصلہ سازی اچ رلایا ونڄے تریمتاں کوں محفوظ ٹرانسپورٹ دیاں سہولتاں تے کم کرݨ دے برابر موقع ݙتے ونڄن ۔تریمتاں کوں پائیدار تحفظ خوراک اچ رلایا ونڄے انہاں کوں ٹیکنیکل ٹریننگ ݙتی ونڄے تے انہاں دے املاک اتے زراعت متعلق حقوق ݙتے ونڄن، تریمتاں کوں معیاری تعلیم اتے تربیت ݙتی ونڄے۔ انہاں کوں سپورٹس،جدید ٹیکنالوجی دے شعبیں میڈیا اتے پالیسی سازی اچ برابر موقع ݙتے ونڄن ۔بعد اچ ایوان قرارداد دی متفقہ منظوری ݙے ݙتی۔صدر نشین عرفان الحق صدیقی رولنگ ݙتی جو متعلقہ قائمہ کمیٹی ایں بارے عملدرآمد دے حوالے نال ایوان کوں ݙساوے۔