فلسطین دی موجودہ صورتحال امت مسلمہ توں وختی ردعمل دی طلب گار اے،  فلسطین اچ انسانی امداد ، نویں سروں تعمیر ، تے غزہ توں اسرائیلی افواج دا انخلا ممکن بݨایا ونڄے، محمد اسحاق ڈار

اسلام آباد۔8مارچ(اے پی پی) نائب وزیراعظم تے وزیر خارجہ سینیٹر محمد اسحاق ڈار آکھیے غزہ اڄ تاریک دور توں گزردا پئے ، ٻالاں تے  تریمتاں سودھے 48 ہزار نشوم فلسطینیاں کوں شہید کیتا ڳئے ،غزہ دا بنیادی ڈھانچہ تباہ تھی چکیے ۔ اے ڳالھ اوآئی سی وزرائے خارجہ کونسل دے خصوصی اجلاس توں خطاب کریندے آکھی ۔ ایں موقع تے وزیر خارجہ سینیٹر محمد اسحاق ڈار عالمی برادری کوں رمضان المبارک دے بابرکت مہینے دی مبارخ ݙیندے دعا کیتی جو ماہ مقدس رمضان دنیا اچ امن ،سلامتی تے خوشحالی گھن آوے۔ انہاں اجلاس دی میزبانی تے خادم الحرمین الشریفین تے سعودی ولی عہد توں اظہار تشکر وی کیتے تے آکھیے جو خصوصی اجلاس سانڳےاو آئی سی دے سیکرٹری جنرل وختی اقدامات یقینی بݨائے۔  انہاں آکھیے غزہ اچ سکول، ہسپتال، مکان، عبادت گاہواں اتے تجارتی و کاروباری مراکز ملبے دا ڈھیر بݨ چکن ۔ محمد اسحاق ڈار مصر اتے امریکا دی طرفوں جنگ بندی دیاں کوششاں کوں امید دی کرن قرارݙیندے آکھیے فلسطین دی موجودہ صورتحال امت مسلمہ توں  وختی ردعمل دی طلب گار اے۔ نائب وزیراعظم و وزیر خارجہ سینیٹر محمد اسحاق ڈار آکھیے پاکستان جنگ بندی دے اقدام کوں قدر دی نگاہ نال ݙیکھدے ، غیر یقینی صورتحال مکاوݨ صرف مستقل امن نال ہی ممکن اے۔ انہاں آکھیے ھک واری ول غزہ اچ انسانی امداد روکی ڳئی اے۔ رمضان المبارک اچ ایں طرح دے ظلم دی شدید طور تے قابل مذمت ہن۔ انسانی امداد دی ترسیل روکݨ جنگی جرائم اچ شمار تھیندے ، غزہ دے عوام دی بقا امداد دی ترسیل توں ہی ممکن اے ، امداد دی ترسیل سانڳے جنگ بندی تے مکمل عملدرآمد ضروری اے۔  نائب وزیراعظم و وزیر خارجہ آکھیے فلسطین اچ جنگ ول شروع تھیوݨ تے جبر دے حوالے نال اسرائیل دی خواہش کوں ھک مٹھ تھی تے روکݨا ہوسی ، انہاں آکھیے مغربی پٹی تے اسرائیلی اقدامات جاری رہݨ تئیں امن دا قیام ممکن نی تھی سڳدا۔ محمد اسحاق ڈار مقبوضہ فلسطین اچ ظلم ، جبر اتے نا انصافیاں وختی مکاوݨ تے زور ݙیندے آکھیےامت مسلمہ واضح کرے جو فلسطینیاں کوں غزہ یا مغربی پٹی توں بے گھر کرݨ نسل کشی اے تے فلسطین دے عوام کوں آپݨے آبائی علاقیں توں بے دخل کرݨ نسل کشی دے مترادف اے۔انہاں مطالبہ کیتے جو اسلامی تعاون تنظیم (او آئی سی ) دی طرفوں فلسطینیاں کوں بے گھر کرݨ دے حوالے نال ہر تجویز کوں رد کیتا ونڄے ، او آئی سی کہیں وی ایجھے ایجنڈے دے خلاف ھک مٹھ تھی ونڄے۔ سعودی عرب اچ فلسطینی ریاست دے قیام دے حوالے نال اسرائیلی وزیراعظم دی تجویز اشتعال انگیز تے قابل مذمت اے۔ نائب وزیراعظم و وزیر خارجہ سینیٹر محمد اسحاق ڈار آکھیے پاکستان ایں حوالے نال سعودی عرب نال مکمل یکجہتی کریندے،امت مسلمہ سانڳے ھک فیصلہ کن لمحہ اے ، فلسطین دے عوام ہمدردی دے بیانات نی بلکہ تکڑے اقدامات چاہندن ۔ انہاں آکھیے اساں آپݨے الفاظ توں نی بلکہ اقدامات توں سنڄاݨیے ویسوں ۔  محمداسحاق ڈار اجلاس اچ پاکستان دی طرفوں مختلف تجویزاں پیش کریندے آکھیے ترائے نکاتی جنگ بندی معاہدے تے عملدرآمد کیتا ونڄے ، جنگ دا مستقل خاتمہ یقینی بݨایا ونڄے۔ انہاں تجویز پیش کیتی جو فلسطین اچ انسانی امداد دی ترسیل اتے نویں سروں جامع منصوبہ وی وختی یقینی بݨایا ونڄے ، غزہ توں  اسرائیلی افواج دا انخلا  ممکن بݨایا ونڄے انہاں پاکستان دی طرفوں تجویز پیش کیتی جو مغربی پٹی اچ اسرائیلی جارحیت وختی مکائی ونڄے ، فلسطینیاں کوں وختی تے کہیں رکاوٹ دے بغیر انسانی امداد ݙیوݨ یقینی بݨائی ونڄے انہاں آکھیے فلسطینیاں کوں جبری بے گھر کرݨ دے عمل کوں سرخ لکیر گردانیا ونڄے۔