تریمتاں کوں باوقار روزگار اتے اپݨا کاروبار ݙیوݨ سانڳے حکومت سارے ضروری وسائل تے تربیت ݙیسی ، وزیراعظم  شہباز شریف

اسلام آباد۔8مارچ(اے پی پی) وزیراعظم محمد شہباز شریف آکھیے تریمتاں کوں باوقار روزگار اتے اپݨا کاروبار ݙیوݨ سانڳے حکومت سارے ضروری وسائل ݙیسی ،  تریمتاں دے کاروبار اچ ودھارے تے تربیت سانڳے سہولت مرکز تئیں رسائی یقینی بݨائی ویسی ، گھریلو و چھوٹے کاروبار نال جڑیاں تریمتاں کوں با اختیار بݨاوݨ سانڳے جامع لائحہ عمل و سفارشات بݨاوݨ سانڳے کمیٹی بݨا ݙتی اے ۔وزیراعظم دفتر میڈیا ونگ موجب اے ہدایت وزیراعظم آپݨی صدارت اچ سمال اینڈ میڈیم انٹرپرائز ڈویلپمنٹ اتھارٹی (سمیڈا) دے تحت  جاری اصلاحات تے جائزہ اجلاس اچ ݙتن ۔وزیرِ اعظم تریمتاں دے جگ ݙیھاڑ تے تریمتاں کوں باوقاو روزگار تے آپݨے کاروبار دے ذریعے با اختیار بݨاوݨ دے حوالے نال وݙا قدم چاتے تے وزیرِ اعظم گھریلو صنعت و چھوٹے کاروبار نال جڑیاں تریمتاں کوں سمال اینڈ میڈیم انٹرپرائز سیکٹر (ایس ایم ای) اچ رلاوݨ دا فیصلہ کیتے ۔ وزیرِاعظم گھریلو صنعت نال جڑیاں کاروباری تریمتاں کوں کاروبار اچ ودھارے سانڳے ضروری سرمائے تے سہولتاں ترجیحی بنیاداں تے ݙیوݨ تے یوتھ لون اسکیم توں تریمتاں کوں گھٹ لاڳت قرضے ݙیوݨ سانڳے اقدامات دی ہدایت کیتی۔ وزیرِاعظم دیہی تے پرے دے علاقیں اچ تعلیم یافتہ تے ہنر مند تریمتاں کوں آپݨے کاروبار نال بااختیار بݨاوݨ سانڳے اقدامات دی وی ہدایت کیتی تے آکھیے جو گھریلو صنعت نال جڑیاں تریمتاں دے کاروبار اچ ودھارے سانڳے انہاں کوں ضروری تربیت ݙتی ونڄے تے ایں حوالے نال سہولت مرکز بݨائے ونڄن ۔ گھریلو و چھوٹے کاروبار نال جڑیاں تریمتاں کوں سہولت مراکز و تربیتی سینٹرز تئیں رسائی یقینی بݨائی ونڄے۔ وزیرِاعظم گھریلو و چھوٹے پیمانے تے کاروبار نال منسلک تریمتاں کوں بااختیار بݨاوݨ دے حوالے نال جامع لائحہ عمل و سفارشات بݨاوݨ سانڳے کمیٹی بݨا ݙتی ، اے کمیٹی تریمتاں کوں آپݨے کاروبار دے ذریعے با اختیار بݨاوݨ سانڳے ضروری  اقدامات تے سفارشات وختی وزیرِ اعظم کوں پیش کریسی ۔ وزیراعظم آکھیے پاکستان دی تقریبا  ادھی آبادی تریمتاں دی ہے ، تریمتاں کوں با اختیار اتے معاشی طور تے مستحکم کرݨ سانڳے حکومت ترجیحی بنیاداں تے اقدامات کریندی پئی اے وزیرِاعظم آکھیے تریمتاں کوں باوقار روزگار اتے اپݨا کاروبار ݙیوݨ سانڳے حکومت سارے ضروری وسائل و تربیت ݙیسی ۔ وزیرِاعظم آکھیے تریمتاں دے کاروبار اچ ودھارے تے تربیت سانڳے سہولت مرکز تئیں رسائی یقینی بݨائی ویسی ۔ وزیراعظم یوتھ لون اسیکم دے ذریعے تریمتاں کوں کاروبار سانڳے گھٹ لاڳت قرضے ݙیوݨ یقینی بݨیسی ۔ ایں موقع تے وزیرِ اعظم کوں سمیڈا دے تحت مائیکرو، سمال اتے میڈیم انٹرپرائزز دی ترقی سانڳے اقدامات تے بریفنگ  وی ݙتی ڳئی ۔اجلاس اچ وفاقی وزرا ء ڈاکٹر مصدق ملک،  احد خان چیمہ، شزا فاطمہ خواجہ، معاون خصوصی ہارون اختر، چیئرمین وزیرِ اعظم یوتھ پروگرام رانا مشہود احمد خان اتے متعلقہ اعلی حکام شرکت کیتی