اسلام آباد۔12مارچ(اے پی پی) پاکستان بھارتی حکام دی طرفوں عوامی ایکشن کمیٹی تے جموں و کشمیر اتحاد المسلمین کوں پنج سال سانڳے غیر قانونی قرار ݙیوݨ دے فیصلے دی مذمت کیتی اے ۔ دفتر خارجہ توں جاری بیان موجب عوامی ایکشن کمیٹی دی قیادت ممتاز سیاسی اتے مذہبی رہنما میر واعظ عمر فاروق کریندے پئن جݙاں جو جموں و کشمیر اتحاد المسلمین دی بنیاد وی ھک ٻئے قابل ذکر سیاسی و مذہبی رہنما مولانا محمد عباس انصاری رکھی ہئی جنہاں 2022 اچ آپݨی وفات تئیں ایندی سربراہی کیتی۔ بیان موجب اڄوکے فیصلے توں کالعدم کشمیری سیاسی جماعتاں اتے تنظیماں دی تعداد 16 تھی ڳئی اے ۔ ترجمان اپݨے بیان اچ مزید آکھیے مختلف سیاسی جماعتاں اتے تنظیماں تے پابندی لاوݨ بھارت دے غیر قانونی طور تے مقبوضہ جموں و کشمیر اچ بھارتی حکام دے آہنی رویے دا ھک ٻیا مظہر اے ۔ انہاں آکھیے اے سیاسی سرگرمیاں اتے اختلاف رائے کوں دباو دی خواہش کوں ظاہر کریندے ، اے جمہوری اصولاں اتے بین الاقوامی انسانی حقوق دے قانون دی سراسر بے توجہی کوں وی ظاہر کریندے ۔ ترجمان بھارتی حکومت توں اپیل کیتی جو او کشمیری سیاسی جماعتاں تے لاتیاں ڳیاں پابندیاں ہٹاوے ، سارے سیاسی قیدیاں کوں رہا کرے اتے جموں و کشمیر تے اقوام متحدہ دی سلامتی کونسل دی قرارداداں تے عمل درآمد کراون۔
