لاہور۔12 مارچ(اے پی پی)پنجاب اسمبلی گداگری ترمیمی بل 2025 کثرت رائے نال منظور کر ڳھدے۔ اے بل گورنر پنجاب کوں منظوری کیتے ٻھیڄیا ویسی جیندے بعد اے ترامیم مسودہ قانون دا حصہ ٻݨسن۔ بل دے مطابق پنجاب اچ پنواوݨ ناقابل ضمانت جرم قرار ݙتا ڳئے، کہیں وی ڄݨے کوں پنواوݨ آلے دے سرغنے کوں 3 سال قید اتے 3 لکھ روپے جرمانہ یا ݙوہیں سزائیں ݙتیاں ویسن، جرمانہ نا ݙیوݨ تے ٻئی 6 مہینے دی قید تھیسی، ہک توں ودھ لوکاں کوں پنواوݨ آلیاں کوں 3 توں 5 سال قید اتے 5 لکھ تئیں جرمانہ یا ݙوہیں سزائیں ملسن۔ ٻالاں کولو پنواوݨ آلے دے سرغنہ کوں 5 توں 7 سال قید اتے 7 لاکھ تئیں جرمانہ تھیسی، جرمانہ نا ݙیوݨ تے ٻئی ہک سال سزا ٻھڳتݨی وہسی، کہیں ٻال یا وݙے جبری معذور کر تے پنواوݨ آلے کوں 7 توں 10 سال قید اتے 20 لکھ تئیں جرمانہ تھیسی، جرمانے نال ݙیوݨ تے گینگ دے سرغنہ کوں ٻئی 2 سال قید دی سزا تھیسی۔ حکومت پنجاب پیشہ ور بھکاریاں اتے مافیا چیفس کوں کیفرِ کردار تئیں پچاوݨ کتیے قانون اچ ترامیم پیش کیتن، صوبائی کابینہ انسداد گداگری دے قانون اچ ترامیم پہلے ہی منظور کرچکی اے۔
