اسلام آباد۔14مارچ (اے پی پی) وفاقی وزیر برائے تجارت جام کمال خان عمان چیمبر آف کامرس اینڈ انڈسٹری دے چیئرمین فیصل عبداللہ الرواس نال مسقط اچ ملاقات کیتی۔ جمعے کوں جاری اعلامیہ موجب گزریل ݙینھ تھیوݨ آلی ملاقات دے بعد چیئرمین عمان چیمبر آف کامرس اینڈ انڈسٹری وفاقی وزیر دے اعزاز اچ افطار عشائیہ وی ݙتا۔ ایں موقع تے پاکستان دے سفارتخانہ اتے عمان چیمبر آف کامرس اینڈ انڈسٹری دی سانجھ نال بزنس ٹو بزنس نیٹ ورکنگ سیشن وی رکھیا ڳئیا جئیں اچ پاکستانی اتے عمانی تاجراں کوں آپسی تجارتی موقع ڳولݨ داموقع ملیا۔ اے ملاقات ہک گھنٹے توں ودھ جاری رہی جئیں اچ پاکستان اتے عمان وچال ݙوپاسہ تجارت دے ودھارے تے ڳالھ کیتی ڳئی۔ چیئرمین فیصل الرواس عمان چیمبر آف کامرس اینڈ انڈسٹری اتے اوندے علاقائی دفتر ولوں تعاون دا یقین ݙوایا۔ وفاقی وزیر تجارت جام کمال خان ایں موقع تے آکھیا جو اساݙے اڄوکے تجارتی اعدادوشمار اساݙے تعلقات کوں نشابر کریندن۔ صرف لاجسٹک اتے مواصلاتی رکاوٹاں ہٹا تے اساں اڄوکے تجارتی حجم کوں ݙو توں ترائے گنا ودھا سڳدوں۔ اساکوں عمان چیمبر آف کامرس اینڈ انڈسٹری اتے پاکستان دے مختلف چیمبرز آف کامرس اتے انڈسٹریز وچال رابطے ودھاوݨ دی لوڑھ اے۔ چیئرمین عمان چیمبر آف کامرس اینڈ انڈسٹری وزیر تجارت نال اتفاق کیتا اتے یقین ݙوایا جو جوائنٹ بزنس کونسل سویں پلیٹ فارمز کوں فعال کیتا ویسی۔
