اسلام آباد۔14مارچ(اے پی پی) وزیراعظم محمد شہباز شریف ملک توں دہشت گردی دی عفریت مکاوݨ سانڳے پاکستان دے پکے عزم دا اظہار اتے پاکستان اتے یورپی یونین وچال تعاون تے شراکت داری کوں مزید تکڑا بݨاوݨ دی خواہش دا اعادہ کیتے۔ وزیراعظم دفتر دے میڈیا ونگ توں جاری بیان موجب اے ڳالھ انہاں یورپی یونین دی سفیر ڈاکٹر رینا کیونکا کوں آکھی جنہاں وزیراعظم نال ملاقات کیتی اے ۔وزیراعظم بلوچستان اچ جعفر ایکسپریس ٹرین تے اڄوکے دہشت گردانہ حملے تے اظہار تعزیت کرݨ تے یورپی یونین دی سفیر دا شکریہ ادا کیتے تے ملک توں دہشت گردی دی عفریت مکاوݨ سانڳے پاکستان دے پکے عزم دا اظہار کیتے ۔ وزیراعظم آکھیے پاکستان تےیورپی یونین وچال پراݨے دوستانہ تعلقات ہن تے انہاں تعلقات اچ مثبت پیشرفت تے اطمینان دا اظہار کیتے۔ انہاں پاکستان دی یورپی یونین نال تعاون تے مبنی شراکت داری بالخصوص جی ایس پی پلس سکیم جئیں آپݨے آغاز توں ہی پاکستان اتے یورپی یونین کوں بھرپور فیدہ پڄائے کوں تکڑا بݨاوݨ دی خواہش دا اعادہ کیتے ۔ملاقات اچ انسانی حقوق سودھے پاکستان اتے یورپی یونین دے تعلقات دے مختلف پہلوواں تے ڳالھ مہاڑ کیتی ۔ وزیراعظم مئی اچ اسلام آباد اچ تھیوݨ آلے پہلے پاکستان-یورپی یونین دے اعلیٰ سطح دے بزنس فورم دے انعقاد دا خیرمقدم کیتے تے یورپی یونین دی سفیر کوں ایں فورم کوں کامیاب بݨاوݨ اچ پاکستان دے مکمل تعاون تے سہولت دا یقین ݙیوائے۔یورپی یونین دی سفیر وزیر اعظم کوں یورپی یونین دے وفد نال پاکستان دے اڄوکے دوریں دے نال نال آندے دوریں دا وی ݙسائے۔
