وفاقی وزیرخزانہ محمداورنگزیب نال ایف پی سی سی آئی دے وفد دی ملاقات

اسلام آباد۔18مارچ(اے پی پی) وفاقی وزیرخزانہ ومحصولات سینیٹر محمد اور نگزیب آکھیے میثاق معیشت دی تیاری  جیھے اقدامات قابل تعریف ہن، ایجھے اقدامات ایں ویلھے وی ایں سانڳے ضروری ہن جݙاں سیاسی جماعتاں ھک مشترکہ اقتصادی مقصد تے متفق ہن،  حکومت صنعتاں سانڳے توانائی دی قیمتاں مزید معقول بݨاوݨ تے برآمدات تےمبنی تے صنعتی ترقی کوں ودھارا ݙیوݨ سانڳے پرعزم اے۔ اے ڳالھ انہاں فیڈریشن آف پاکستان چیمبرز آف کامرس اینڈ انڈسٹریز دے  وفد کوں ملاقات اچ آکھی ۔ وفد دی قیادت ایف پی سی سی آئی دے صدر میاں عاطف اکرام، پیٹرن ان چیف ایس ایم تنویر اتے ایف ایف سٹیل دے چیف ایگزیکٹو سینیٹر نعمان وزیر کریندے پئے ہن ۔ ملاقات دا مقصد ایف پی سی سی آئی دی تیار کیتی ڳئی میثاق معیشت کوں وزیر خزانہ تے انہاں دی ٹیم دے سامݨے پیش کرݨ ہئی ۔ وفد میثاق تے تفصیل نال روشنی پاتی تے ݙسائے جو ایندا مقصد اقتصادی چیلنجزنال نبݨݨ سانڳے ملک اچ سیاسی اتفاق رائے پیدا کرݨ ،پاکستان کوں اقتصادی بحران توں کڈھݨ ، ملک دی ترقی اتے اقتصادی نموکوں ترجیح ݙیوݨ تے خاص طور تے ودھدی آبادی دی لوڑھ کوں پورا کرݨ اے جنہاں اچ نینگراں دا حصہ خاص طور تے اہم اے۔ سینیٹر نعمان وزیر خٹک میثاق معیشیت اچ شامل تجویزاں تے سفارشات تے تفصیلی پریزنٹیشن  ݙتی جنہاں اچ توانائی، مالیات، صنعت تے صحت جیھے اہم شعبیں اچ ماہر گروپاں دے قیام دی صورت اچ خصوصی سول سروسز دی تنظیم نو وی شامل ہئی تاں جو پالیسی سازی دے ذریعہ بہتر فیصلے کیتے ونڄ سڳن۔  ایف پی سی سی آئی دے وفد وزیر خزانہ تے انہاں دی ٹیم دیاں کوششاں دی تعریف کیتی تے امید ظاہر کیتی جو حکومت پاکستان دی اقتصادی ترقی اتے صنعتی نوعیت دے مسئلے کوں حل کرݨ سانڳے مزید اقدامات کریسی۔  ملاقات اچ وزارت خزانہ تے فیڈرل بورڈ آف ریونیو دے سینئر افسروی شریک ہن ایں توں انڄ کاروباری طبقے دے نمایاں لوکاں اچ ایف پی سی سی آئی دے صدرعاطف اکرام، سینیٹرنعمان وزیر، یونائٹڈ بزنس گروپ دے پیٹرن ان چیف ایس ایم تنویر، رکن قومی اسمبلی ڈاکٹر مرزا اختیاربیگ ، اسلام آباد چیمبردے سابق صدراحسن بختاوری، گارڈ گروپ دے مومن ملک، ذخی اعجاز،طارق مھمود، ناصرقریشی، سہیل الطاف، اشفاق احمد، طارق جدون، ملک سہیل، عدیل روف، ریاض ارشد، قرت العین تے حامد ولید شامل ہن۔