بلوچستان دے نینگراں کوں تعلیم تے ترقی دے موقع ݙیوݨ سانڳے مؤثر حکمتِ عملی بݨائی ونڄے ،وفاقی وزیراحسن اقبال

اسلام آباد۔18مارچ  (اے پی پی) وفاقی وزیر منصوبہ بندی، ترقی و اصلاحات احسن اقبال آکھیے مسلم لیگ (ن )دی حکومت بلوچستان دے نینگراں کوں اعلیٰ تعلیم دیاں سہولتاں ݙیوݨ سانڳے ماضی اچ ٻہوں سارے اہم تعلیمی منصوبے شروع کیتن، لوڑھ ایں ڳالھ دی ہے جو بلوچستان دے عوام کوں انہاں منصوبیں دی مکمل آگاہی ݙتی ونڄے تاں جو بلوچستان اچ دہشت گردی کرݨ آلے گروپاں دی سازشں ناکام بݨائی ونڄ سڳے۔ اے ڳالھ انہاں سنٹرل ڈویلپمنٹ ورکنگ پارٹی دے اجلاس اچ آکھی ۔ وفاقی وزیر مزید آکھیے 2013 توں 2018 دے دوران مسلم لیگ (ن ) دی حکومت بلوچستان دے طالبیں سانڳے ملک دی بہترین یونیورسٹیاں اچ 5,000 سکالرشپس ݙتیاں جݙاں جو پی ڈی ایم حکومت دے دوران مزید 5,000 سکالرشپس فیز ٹو اچ ݙتے ڳئن ۔ انہاں چیئرمین ہائر ایجوکیشن کمیشن (ایچ ای سی) کوں ہدایت کیتی جو بلوچستان دے نینگراں کوں تعلیم تے ترقی دے موقع ݙیوݨ سانڳے وختی طور تے ھک جامع تے مؤثر حکمتِ عملی بݨائی ونڄے تاں جو او ھک تکڑے تے مستحکم پاکستان دا حصہ بݨ سڳن۔احسن اقبال مزید آکھیے نینگراں کوں مثبت نصابی اتے غیر نصابی سرگرمیاں اچ رلایا ونڄے انہاں سانڳے اعلیٰ تعلیمی موقع ݙتے ونڄن ایں سلسلے اچ انہاں جامعات دے وائس چانسلرز کوں ہدایت کیتی جو او علاقائی بنیاداں تے یونیورسٹیاں اچ گروہ بندی مکاوݨ سانڳے ہاسٹلاں اچ طالبیں کوں مختلف علاقی نال رہائش ݙیون تاں جو انہاں اچ یکجہتی پیدا تھیوے ۔انہاں ایں عزم دا اعادہ کیتے جو حکومت نینگراں دی بہتری اتے انہاں دے روشن مستقبل سانڳے ہر ویلھے کوشاں اے تے انہاں کوں تعلیمی و ترقیاتی منصوبی دے ذریعے قومی دھارے اچ رلاوݨ سانڳے ہر ممکن اقدامات کیتے ویسن۔