کھنڈ دا نرخ 164 روپے فی کلو رہسی، ایکس مل نرخ 159 روپے فی کلو توں ڳھٹ ہوسی، نائب وزیر اعظم سینیٹر محمد اسحاق ڈار

اسلام آباد۔19مارچ  (اے پی پی) نائب وزیر اعظم اتے وزیر خارجہ سینیٹر محمد اسحاق ڈار آکھیا جو کھنڈ دا نرخ 164 روپے فی کلو رہسی، ایکس مل نرخ 159 روپے فی کلو توں ڳھٹ ہوسی۔ بدھ کوں کھنڈ دے نرخ دا جائزہ ڳھنݨ دے اعلیٰ سطح دے اجلاس دی صدارت دے بعد اہم فیصلیاں دا اعلان کریندیں ہوئیں نائب وزیر اعظم آکھیا جو کھنڈ دی 178-180 روپے فی کلو فروخت ناقابل برداشت اے۔ انہاں آکھیا جو ہک ذیلی کمیٹی ٻݨائی ویندی پئی اے جیڑھی ہک مہینے اچ ایں مسئلے کوں حل کرݨ کیتے سفارشات پیش کریسی۔ انہاں آکھیا جو کھنڈ دے نرخ دے معاملے دا جائزہ ڳھنݨ کیتے وزیراعظم دی ہدایت تے ٻݨائی ڳئی کمیٹی رمضان دے مقدس مہینے اچ نرخاں اچ ودھارے دے بعد ماضی اچ کئی اجلاس کیتن۔ انہاں آکھیا جو وزیر برائے نیشنل فوڈ سکیورٹی اینڈ ریسرچ رانا تنویر حسین دی سربراہی اچ ذیلی کمیٹی ایں بارے 19 اپریل توں پہلے آپݨی رائے ݙیسی۔ انہاں آکھای جو شوگر ملز ایسوسی ایشن آپݨی وجوہات بیان کیتن اتے انہاں ایں معاملے تے تفصیلی ڳالھ کیتی اے۔ انہاں آکھیا جو کھنڈ دے نرخ ولا ولا ودھدا پئے، رانا تنویر حسین دی سربراہی اچ نرخاں دا جائزہ ڳھنݨ کیتے کمیٹی ٻݨا ݙتی ڳئی اے۔ 274 سستے بازاراں اچ کھنڈ 130روپے فی کلوݙتی ویندی پئی اے۔ اجلاس اچ وفاقی وزیر برائے نیشنل فوڈ سکیورٹی رانا تنویر حسین، وفاقی وزیر قانون تے انصاف اعظم نذیر تارڑ، وزیراعظم دے مشیر ہارون اختر، شوگر ملز ایسوسی ایشن دے نمائندے اتے متعلقہ حکام شریک تھیے۔