صدر مملکت ولوں یوم پاکستان اتے عید الفطر دے موقع تے قیدیاں دی سزائیں اچ 180 ݙینھ دی خصوصی چھوٹ دا اعلان

اسلام آباد۔21مارچ  (اے پی پی) صدر مملکت ولوں یوم پاکستان اتے عید الفطر دے موقع تے قیدیاں دی سزائیں اچ 180 ݙینھ دی خصوصی چھوٹ دا اعلان کیتے۔ جمعے کوں ایوان صدر دے پریس ونگ توں جاری بیان موجب صدرمملکت سزائیں اچ ڳھٹکی دی منظوری آئین دےآرٹیکل 45 دے تحت ݙتی اے۔ سزائیں اچ ڳھٹکی دا اطلاق قتل، جاسوسی، ریاست مخالف سرگرمیاں اچ ملوث قیدیاں تے کائنا ہوسی۔ سزائی اچ ڳھٹکی دا اطلاق زنا، چوری ، ڈکیتی، اغواء، دہشت گردی اچ سزا یافتہ مجرماں تے وی کائنا ہوسی۔ سزائی اچ ڳھٹکی دا اطلاق مالی جرائم اتے قومی خزانے دا ضیان کرݨ آلے مجرماں تے وی کائنا ہوسی۔  سزا اچ ڳھٹکی دا اطلاق غیر ملکی افراد ایکٹ، 1946 اتے منشیات کنٹرول (ترمیمی) ایکٹ 2022 ء دے تحت سزا یافتہ لوکاں تے وی کائنا ہوسی۔ ہک تہائی قید کٹݨ آلے 65 سال توں ودھ عمر دے مرد قیدیاں تے سزا اچ ڳھٹکی دا اطلاق ہوسی۔ ہک تہائی قید کٹ ڳھنݨ آلی سٹھ سال توں ودھ دی تریمتیں تے وی سزا اچ ڳھٹکی دا اطلاق ہوسی۔ ٻالاں نال جیل اچ موجود تریمتیں قیدیاں تے وی سزا اچ ڳھٹکی دا اطلاق ہوسی۔ ہک تہائی سزا کٹ ڳھنݨ آلے 18 سال توں ڳھٹ عمر دے بندیاں تے وی سزا اچ ڳھٹکی دا اطلاق ہوسی۔