سینیٹ دے چیئرمین اتے  ڈپٹی چیئرمین دی اے پی پی ایمپلائز یونین دے نویں منتخب عہدیداراں کوں مبارخ

اسلام آباد۔26مارچ(اے پی پی) چیئرمین سینیٹ سید یوسف رضا گیلانی تے ڈپٹی چیئرمین سینیٹ سیدال خان ایسوسی ایٹڈ پریس آف پاکستان(ا ے پی پی) ایمپلائز یونین اسلام آباد دے اڄوکے انتخابات اچ کامیابی گھنݨ آلے صدر اتے سینئر صحافی طارق محمود چوہدری، نائب صدور شمائلہ نورین تے سہیل اقبال چیمہ، جنرل سیکرٹری محمد قاسم گجر، فنانس سیکرٹری طاہر ندیم، پریس سیکرٹری صنم جونیجو سودھے سارے نویں منتخب عہدیداراں کوں دلی مبارخ ݙتی ۔ سینیٹ سیکرٹریٹ توں جاری بیان موجب اپݨے مشترکہ تہنیتی پیغام اچ چیئرمین سینیٹ سید یوسف رضا گیلانی اتے ڈپٹی چیئرمین سیدال خان نویں منتخب قیادت کوں انہاں دی کامیابی تے مبارخ ݙیندے امید ظاہر کیتی جو او کارکنان دی فلاح بہبود تے صحاتی ادارے دی بہتری سانڳے چنڳاں کردار نبھیسن ، انہاں آکھیے صحافت کہیں وی جمہوری معاشرے دا ھک بنیادی ستون اے، اتے آزاد، متحرک تے ذمہ دار میڈیا ہی عوام کوں صحیح معلومات ݙیوݨ تے جمہوری اقدار کوں ودھارا ݙیوݨ اچ کلیدی کردار ادا کریندے ۔سینیٹ قیادت آکھیے اے پی پی جیھے قومی خبر رساں ادارے اچ محنتی اتے باصلاحیت لوکاں دی قیادت ادارے دی ترقی سانڳے ھک مثبت قدم اے۔ انہاں آکھیے نویں منتخب عہدیداراں اپݨی صلاحیتاں کوں بروئے کار گھن آندے ہوئیں صحافی برادری دے حقوق دے تحفظ، مسئلیں دے حل تے پیشہ ورانہ بہتری سانڳے کم کریسن ۔ انہاں مزید آکھئے میڈیا ورکرز دی فلاح و بہبود حکومت اتے متعلقہ اداریں دی اولین ترجیح ہووݨی چاہیدی اے تے سینیٹ آف پاکستان ہمیشہ صحافیاں دے جائز حقوق، انھاں دے روزگار دے تحفظ، آزادی اظہار اتے بہتر کم دے ماحول دے قیام سانڳے ہرممکن تعاون کریسی ۔چیئرمین تے ڈپٹی چیئرمین سینیٹ ایں عزم دا اظہار کیتے جو میڈیا دے سارے شعبیں اچ کم کرݨ آلے لوکاں دی خدمات کوں تسلیم کیتا ویسی تے انہاں دے حقوق سانڳے آواز چاتی ویسی ۔ انہاں آکھیے اے پی پی ایمپلائز یونین دی نئی قیادت کوں سارے کارکنان دی امیداں تے پورا لہݨ سانڳے ݙینھ رات محنت کرݨی ہوسی تاں جو ھک ایجھا تکڑا ،خودمختار اتے پروفیشنل ماحول بݨے جیڑھا صحافت دی ترقی اچ معاون ثابت تھیوے۔چھیکڑ اچ ، چیئرمین تے ڈپٹی چیئرمین سینیٹ نویں منتخب عہدیداراں سانڳے نیک خواہشات دا اظہار کریندے آکھئے جو او آپݨے فرائض ایمانداری، دیانت داری اتے پیشہ ورانہ اصولاں موجب ادا کریسن تے ادارے دی بہتری سانڳے نویں رستے متعین کریسن۔