ملک کوں معاشی استحکام دی منزل نال ہمکنارکرݨ ھک طویل جدوجہد اے، وزیراعظم  شہباز شریف دا آئی ایم ایف نال سٹاف لیول معاہدے تے اطمینان دا اظہار

اسلام آباد۔26مارچ(اے پی پی) وزیراعظم محمد شہباز شریف آئی ایم ایف نال سٹاف لیول معاہدے تے اطمینان دا اظہار کریندے آکھئے تنخواہ دار طبقے  تے عام آدمی ٻوجھ برداشت کیتے،گزریل سال دے مقابلے اچ ہݨ تئیں 12 کھرب روپے اضافی وصول کیتے ڳئن ،ملک کوں معاشی استحکام دی منزل نال ہمکنارکرݨ ھک طویل جدوجہد اے، اساکوں قرضیں کوں مکا تے آپݨے پیراں تے کھڑا تھیوݨا ہوسی ،پاکستان وختی آپݨا ونڄا مقام حاصل کریسی ،رمضان پیکج دے حوالے نال ملکی تاریخ اچ پہلی واری ڈیجیٹل والٹ دا اجراء کیتا ڳئے ، پیکج دے تحت 20ارب روپے اچوں 60فیصد رقم ونڈا ݙتی ڳئی اے ۔ اے ڳالھ انہاں وفاقی کابینہ اجلاس توں خطاب کریندے آکھی ۔ وفاقی کابینہ دے اجلاس اچ چیف آف آرمی سٹاف جنرل  سید عاصم منیر دی والدہ دے ایصال ثواب سانڳے فاتحہ خوانی کیتی ڳئی ۔وزیراعظم وفاقی کابینہ دی طرفوں چیف آف آرمی سٹاف نال تعزیت اتے ہمدردی دا اظہار کیتے۔ وزیراعظم معاونین خصوصی سودھے وفاقی کابینہ دے سارے شرکاء دا خیرمقدم کریندے کابینہ کوں ݙسائے جو آئی ایم ایف نال گزریل رات سٹاف لیول معاہدہ طے پا ڳئے ۔وزیراعظم آکھیے او نائب وزیراعظم، وزیر خزانہ، ٻعے متعلقہ وزراء  تے حکام دے شکرگزار ہن جنہاں ݙینھ رات کم کیتے ۔ آئی ایم ایف نال طے پاوݨ آلے معاہدے اچ آرمی چیف دا وی کلیدی کردار رہیے، ݙینھ رات دی محنت تے ھک ٹیم ورک دے نتیجے اچ کامیابی ملی اے ۔وزیراعظم آکھیے آئی ایم ایف معاہدے دے حوالے نال اغیاردے اوچھے ہتھکنڈیں کوں ناکامی دا سامݨا کرݨا پئے۔ انہاں ڈھنڈورے پٹیے ہن جو منی بجٹ دے بغیر آئی ایم ایف اڳوں نہ ودھسی ، موجودہ حکومت ھک اوکھے تے چیلنجنگ صورتحال  جݙاں جو ݙو صوبیں اچ دہشتگردی جاری اتے مہانگ عروع تے ہئی ھک ٹیم ورک دے طور تے کم کیتے تے حکومت دی انتھک کوششاں  پاروں اتنا وختی اے ہدف حاصل کرݨ ممکن تھئے ،دہشتگردی تے مہانگ دے باوجود معاہدہ طے پاوݨ حکومت دی سنجیدگی کوں ظاہر کریندے ، پوری قوم ایں ہدف اچ بے پناہ قربانیاں ݙتن،کامیابی نال معاہدے دے طے تھیوݨ اچ عام آدمی دا وی انتہائی اہم کردار اے۔ انہاں آئی ایم ایف پروگرام اچ صوبیں دے کردار دی وی تعریف کیتی تے آکھئے جو زرعی ٹیکس دے بغیر آئی ایم ایف اڳوں نہ ودھݨا ہئی ساریں توں پہلے پنجاب قانون سازی کیتی ت ول باقی سارے صوبیں وی  وفاق دا ساتھ ݙتا ۔وزیراعظم ݙسائے  آئی ایم ایف دے پروگرام اچ 1.3ارب ڈالردا  آر ایس ایف وی شامل اے۔وزیراعظم آکھئے پاکستان دی معیشت کوں استحکام ݙیوݨ دے حوالے نال اے وݙی کامیابی اے ، انہاں آئی ایم ایف کنٹری ڈائریکٹر  تے انہاں دی ٹیم دا وی چنڳے تعاون تے شکریہ ادا کیتے۔ وزیراعظم ݙسائے آئی ایم ایف گزریل سال 9کھرب دا ہدف مقرر کیتا ہئی ، اڄوکے سال 12.9 ٹریلین دا ہدف ہئی، حکومت ھک سال اچ ایں حوالے نال جیڑھا کم کیتے او لائق تحسین اے ،آئی ایم ایف جیڑھا ریونیوہدف ݙتا ہئی اساں ایں اچ ودھارا کیتے ایں حوالے نال تنخواہ دار طبقے دے کردار کوں بُھلایا نی ونڄ سڳدا ، محصولات دی وصولی اچ گزریل سال دی نسبت26فیصد ودھارا چنڳی ڳالھ اے ،ٹیکس کولیکشن ٹو جی ڈی پی 10.8 تے آڳئی اے جݙاں جو آئی ایم ایف 10.2 دا ہدف مقرر کیتا ہئی ایویں  ٹیکس کولیکشن دا ہدف 10.9 کھرب روپے مقرر کیتا ہئی ، آئی ایم ایف پیش کش کیتی جو ایں کوں مزید گھٹا ݙیندوں لیکن میں آکھئے ایں دی لوڑھ کائنی جیں تے آئی ایم ایف حیران رہ ڳیا،ٹیم ور ک دے نتیجے اچ اساں ایں کوں 10.3 تے گھن آئیوں ۔وزیراعظم آکھیے ملک کوں معاشی  استحکام دی  منزل نال ہمکنارکرݨ ھک لمبی جدوجہد اے،انتھک محنت اتے لگن نال کم کریندے رہیے تاں پاکستان ضرور ترقی کریسی ۔وزیراعظم ݙسائے جو عدالتاں اچ ٹیکس مقدمیں دی بہتر پیروی توں قومی خزانے اچ 34 ارب روپے واپس آچکن ،ٹریبیونلز توں گھن تے سپریم کورٹ تئیں کھرباں دے مقدمے عدالتاں وچ ہن ، اے 34ارب روپے ٻُݙ چکئے ہن نویں میکنزم دے تحت ایں دی ریکوری ٻہوں وݙی کامیابی اے تے ایں وچ وزیر قانون ، اٹارنی جنرل ، چیئرمین ایف بی آر اتے گورنر سٹیٹ بنک دا وݙا کردار اے ، محصولات متعلق عدالتی مقدمیں تے مکمل طور تے توجہ ݙیندے پیوں ،وزارت قانون ٹیکس متعلق مقدمیں اچ اہم کردار نبھائے ۔ وزیراعظم ݙسائے ایف بی آراچ ڈیجٹائزیشن دے حوالے نال اقدامات تکھے جاری ہن ،فیس لیس انٹریکشن تے وی کم تھیندا پئے ،ٹریبونلز سانڳے کارپوریٹ لائرز، چارٹرڈ اکائوٹنٹس کہیں پسند اتے نا پسند دی بنیاد تے کائنی بلکہ ھک سسٹم دے تحت منتخب کیتے ویندے پئن ، ٹریبیونلزاچ انہاں دی تعیناتی  سانڳے سپریم کورٹ دے جج دی سربراہی اچ شفاف نظام بݨایا گئے ۔ وزیراعظم ݙسائے انہاں کھنڈ دے سیکٹر دی نگرانی دا خود جائزہ گھنݨ دا فیصلہ کیتے ، کھنڈ دے سیلز ٹیکس دی چوری تے قابو پاوݨ سانڳے اقدامات کیتے ویندے پئن گزریل سال دی نسبت اڄوکے سال شوگر ملز سیکٹر توں ہݨ تئیں 12 ارب روپے وصول تھی چکئن ،شوگر ملز سیکٹر توں 60 ارب روپے توں ودھ محصولات دا ہدف اے۔وزیراعظم آکھئے سیمنٹ ، تماخوں سودھے ہر سیکٹرکوں ہݨ ٹیکس دے دائرہ کاراچ رلݨا ہوسی ،ٹیکس ݙیوݨ نال ہی ملک چلدن ،قرضے گھنݨ خوشی دی ڳالھ کائنی ، قرضے مکا تے آپݨے پیراں تے کھڑا تھیوݨا ہوسی ۔وزیراعظم  آکھیے امن تے ترقی لازم وملزوم ہن،دہشتگردی مکاوݨ تے امن دے قیام نال ہی ترقی دا عمل اڳوں ودھ سڳدے۔ دہشتگردی دے خلاف ڈٹ تے مقابلہ کرݨ آلی سکیورٹی فورسز دی پذیرائی کریندے آکھئے دہشتگردی روکݨ سانڳے جیڑھیاں لازوال قربانیاں ݙتیاں ویندیاں پئن او کݙاہیں بُھلائیاں نہ ویسن ۔وزیراعظم آکھیے رمضان پیکج دے حوالے نال ملکی تاریخ اچ پہلی واری ڈیجیٹل والٹ جاری کیتا ڳئے پیکج توں مستحق لوکاں تئیں شفاف طریقے نال ریلیف پڄاوݨ ساݙا مقصد اے ،رمضان پیکج دے تحت 20ارب روپے اچوں 60فیصد رقم ونڈا ݙتی ڳئی اے ، ماضی اچ یوٹیلٹی سٹورز دے ذریعے جیڑھی امداد ݙتی ڳئی ایں اچ کرپشن ، ناقص اتےغیرمعیاری چیزاں ݙیوݨ تے عوام کوں تکلیف دیاں شکایتاں ہن ایں سانڳے ایں نظام کوں ختم کرݙتا ڳئے انہاں آکھیے ڈیجیٹل والٹ دے ماڈل کوں ݙوجھے شعبیں اچ وی متعارف کرایا ویسی ۔وزیراعظم صدر پاکستان دی طرفوں ذوالفقار علی بھٹو مرحوم کوں شاندار خدمات تے نشان پاکستان عطا کرݨ دی تعریف کریندے آکھئے ذوالفقار علی بھٹو نال تاریخ اچ جیڑھی زیادتی تھئی ایں دا ازالہ تاں نی کیتا ونڄ سڳدا لیکن انہاں دی خدمات دے اعتراف توں انہاں دی روح کوں تسکین پُڄی ہوسی