وزیراعظم دی اڳواݨی اچ وفاقی کابینہ دا اجلاس، پٹرولیم مصنوعات اتے بجلی دیاں قیمتاں ڳھٹاوݨ سودھا کئی امور تے غور

اسلام آباد۔26مارچ(اے پی پی)وفاقی کابینہ پاور ڈویژن دی سفارش تے پٹرولیم مصنوعات دیاں قیمتاں اچ کمی دا حجم بجلی صارفین دیاں قیمتاں ڳھٹاوݨ کیتے استعمال کرݨ، سی پی پی اے کوں بیگاس تے چلݨ آلے پاور پلانٹس نال معاہدیاں کوں نظرثانی شُدہ شرائط دے مطابق دستخط کرݨ دی منظوری ݙے ݙتی۔ وفاقی کابینہ وزارت قانون و انصاف دی سفارش تے وسل بلوئر پروٹیکشن اینڈ وجیلینس کمیشن ایکٹ، 2025 دی اصولی منظوری ݙتی اے۔ وزیراعظم محمد شہباز شریف دی زیر صدارت وفاقی کابینہ دا اجلاس وزیراعظم ہاؤس اچ تھئے۔ وزیراعظم محمد شہباز شریف پاکستان اتے عالمی مالیاتی فنڈ وچال ایکسٹینڈڈ فنڈ فیسیلیٹی دے ریویو بارے سٹاف لیول معاہدے اتے ماحولیاتی تبدیلی دے خلاف پاکستان دی معاونت کیتے 1.3 ارب امریکی ڈالرز دے فنڈز سانڳے معاہدے تے اطمینان کیتے۔ انہاں آکھیے جو آئی ایم ایف نال 7 ارب امریکی ڈالرز دا پہلا سٹاف لیول معاہدے دا ریویو مکمل تھی چکیے، جیندے نال آئی ایم ایف پاکستانی معیشت تے اعتماد ݙکھائے اتے آئی ایم ایف پچھلے 18 مہیناں اچ میکرو اکنامک استحکام دی بحالی بارے پیشرفت، مالی صورتحال دی بہتری اتے افراط زر 2015 دے بعد اپݨی ڳھٹ ترین سطح تے آوݨ اتے معیشت اچ استحکام تے پاکستان دی تعریف کیتی اے، آئی ایم ایف معیشت اچ اصلاحات اتے گورننس اچ بہتری کیتے حکومت پاکستان دے اقدامات دی تعریف کیتی اے۔ وزیراعظم انہاں معاہدیاں بارے وفاقی وزیر خزانہ و محصولات محمد اورنگزیب اتے حکومت دی معاشی ٹیم دی کارکردگی دی وی تعرفی کیتی اتے آکھیے جو معاہدیاں نال پاکستان دی معیشت کوں مستحکم اتےایکوں طویل مدتی بحالی دی راہ تے سٹݨ اچ مدد ملسی، حکومت ٹیکس اصلاحات، توانائی دے شعبے دی بہتر کارکردگی اتے نجی شعبے دی ترقی ڄھیں اہم شعبیاں بارے ترجیحی بنیاداں تے کم کریندی پئی اے، پچھلے ہک سال اچ مثبت معاشی اعشاریے حکومت دی مثبت پالیسیاں دا ثبوت ہین، پاکستان دے معاشی استحکام دے لائحہ عمل، مؤثر کارکردگی اتے ایں بارے پائیدار منصوبہ بندی کیتے پرعزم ہیں۔ انہاں آکھیا جو اللہ تعالیٰ رمضان المبارک دے بابرکت مہینے اچ ساکوں پاکستان ڄھیں نعمت بخشی اے، ساکوں رل تے ملک دی ترقی و خوشحالی کیتے کم کرݨے۔ وفاقی کابینہ پاور ڈویژن دی سفارش تے پٹرولیم مصنوعات دی قیمتاں اچ کمی دا حجم بجلی صارفین دی قیمتاں ڳھٹاوݨ کیتے استعمال کرݨ دی منظوری ݙتی اے اتے سینٹرل پاور پرچیزنگ ایجنسی (سی پی پی اے ) کوں بیگاس تے چلݨ آلے پاور پلانٹس نال معاہداں کوں نظرثانی شُدہ شرائط دے مطابق دستخط کرݨ دی وی منظوری ݙتی اے۔ کابینہ وزارت قانون و انصاف دی سفارش تے وسل بلوئر پروٹیکشن اینڈ وجیلینس کمیشن ایکٹ، 2025 دی اصولی منظوری ݙتی۔ وفاقی کابینہ ریونیو ڈویژن دی سفارش تے اسلام آباد کیپٹل ٹیریٹری دی حدود اچ انکم ٹیکس، سروسز تے سیلز ٹیکس اتے فیڈرل ایکسائز ڈیوٹیز اچ مزید ترامیم دی وی منظوری ݙتی۔ اے ترامیم ریسورس موبلائزیشن اتے یوٹیلائزیشن ریفارم پروگرام بارے پالیسی ایکشنز سانڳے کیتیاں ڳن، ایں سانڳے کڄھ ترامیم 2023 اتے 2024 اچ کیتاں ونڄ چکین۔ وفاقی کابینہ ریونیو ڈویژن دی سفارش تے کل وقتی اساتذہ اتے محققین دی آمدنی تے ٹیکس ریبیٹ دی بحالی بارے انکم ٹیکس (سیکنڈ امنڈمینٹ) بل 2025 دی وی منظوری ݙتی۔ اجلاس کابینہ کمیٹی برائے نجکاری دے 11 مارچ 2025 دے اجلاس دے فیصلاں دی توثیق کیتی۔ وفاقی کابینہ اقتصادی رابطہ کمیٹی دے 13 مارچ 2025 اتے 21 مارچ 2025 دے اجلاس دے فیصلاں دی وی توثیق کیتی ٻھل کابینہ ای سی سی دی منظور شُدہ سولر نیٹ میٹرنگ ریگولیشنز بارے مشاورت دا دائرہ اکر ودھاوݨ اتے سارے فریقین دی رائے ڳھنݨ دے بعد اے سفارشات کابینہ کوں ولا پیش کرݨ دا فیصلہ کیتے۔