اسلام آباد۔30مارچ(اے پی پی) وزیراعظم یوتھ پروگرام دے چیئرمین رانا مشہود احمد خاں پاکستان اچ ہالینڈ دی سفیر ہینی ڈی وریس نال وزیراعظم دفتر اچ ملاقات کیتی تاں جو وزیراعظم یوتھ پروگرام اتے ہالینڈ وچال نینگراں کوں بااختیار بݨاوݨ دے حوالے نال مستقبل اچ تعاون دے رستے تے ڳالھ مہاڑ کیتی ونڄ سڳے ۔ وزیراعظم یوتھ پروگرام توں جاری اعلامیہ موجب ملاقات اچ فرسٹ سیکرٹر ی ہیسکے، حنا ادریس، سینئر پالیسی افسر برائے پبلک ڈپلومیسی، اتے وزیراعظم یوتھ پروگرام دے سینئر عہدیداراں شرکت کیتی جئیں اچ دیرتئیں سانجھے داری دی تعمیر تے توجہ ݙیوݨ آلی خوشگوارڳالھ مہاڑ کوں یقینی بݨایا ڳئے ۔ ملاقات اچ ݙوہیں ملکاں دے نینگراں کوں مفید اقدامات دے ذریعے تکڑے ݙوپاسے تعلقات ودھاوݨ دے سانجھے عزم تے زورݙتا ڳئے تے ممکنہ تعاون دے کلیدی شعبے ڳولیے ڳئن ، خاص طور تے نینگراں کوں بااختیار بݨاوݨ تے کھیݙاں دی ترقی دے میدان اچ او شعبے جیڑھے جو کمیونٹیز تے وݙی مدتی مثبت اثرات پاوݨ دی طاقت رکھیندن ۔ملاقات اچ آندے کنگز ڈے دی تقریبات تے وی ڳالھ مہاڑ تھئی جیڑھا جو اپریل دے چھیکڑ اچ تھیسی ، جتھاں ہالینڈ دے بھرپور ثقافتی ورثے کوں منایا ویسی ۔ قابل ذکر ڳالھ اے ہے جو ایں تقریب وچ مشہور ہاکی لیجنڈ فلوریس جان بوویلینڈردی شرکت تھیسی جیڑھے کھیݙاں متعلق سرگرمیاں اچ آپݨی شمولیت دے ذریعے ݙوہیں ملکاں وچال رابطے تکڑے کریسن ۔ ݙوہیں فریقاں مستقبل دی کوششاں کیتے آوݨ آلے سالاں اچ ڳالھ مہاڑ تے تعاون سانڳے واضح عزم نال آپݨے جوش و خروش دا اظہار کیتے جنہاں دا مقصد نینگراں کوں فیدہ پڄاوݨ اے۔
