اسلام آباد۔30مارچ(اے پی پی) وفاقی وزیر سمندری امورمحمد جنید انوار چوہدری آکھئے جو پاکستان دے سمندری وسائل دی حفاظت اتے ساحلی ماحولیاتی نظام دی بحالی ٻہوں ضروری اے۔ انہاں آکھئے پلاسٹک فضلے کوں گھٹ کرݨ سانڳے قومی سطح تے منصوبہ بندی اتے عملی اقدامات دی لوڑھ اے تاں جو سمندری آلودگی کوں گھٹ کیتا ونڄ سڳے ۔ زیرو ویسٹ دے جڳ ݙیھاڑ تے آپݨے سنھیے اچ وفاقی وزیرجنید انور چوہدری مزید آکھئے بین الاقوامی موسمیاتی اہداف نال ہم آہنگی اتے بندرگاہواں اچ گرین ٹیکنالوجی دے ذریعے کاربن اخراج کوں گھٹ کرسڳدوں ۔ انہاں اے وی آکھئے اساں ساحلی علاقیں اچ مینگروو جنگلات دی افزائش تے کم کریندے پیوں تے پائیدار نیلی معیشت دے ودھارے سانڳے سرمایہ کاری دی حوصلہ افزائی کریسوں ۔ وفاقی وزیر اے وی آکھئے جو سمندری آلودگی روکݨ سانڳے بین الاقوامی معیارات تے عمل درآمد اتے سمندری حیاتیاتی تنوع دی حفاظت سانڳے ماحولیاتی ضروری اقدامات چیندے پیوں ۔ انہاں اے واضح کیتے جو بندرگاہواں اچ صاف توانائی دے حل کوں ودھارا ݙتا ویندا پئے تاں جو ساݙے سمندری وسائل کوں بچایا ونڄ سڳے ۔جنید انور چوہدری آکھئے ساحلی علاقیں اچ ماحولیاتی بحالی سانڳے کمیونٹی دی شرکت ٻہوں ضروری اے تے صنعتی فضلے نال نبݨݨ دے ضوابط تے عمل درآمد یقینی بݨایا ویسی ۔ انہاں ایں ڳالھ تے زور ݙتے جو سمندری وسائل دے تحفظ سانڳے مزید سرمایہ کاری کیتی ویسی تاں جو پاکستان دے سمندری ماحول کوں بہتر بݨایا ونڄ سڳے۔
