لاہور ۔30مارچ(اے پی پی) وزیراعظم محمد شہباز شریف جمہوریہ ترکیہ دے صدر عزت مآب رجب طیب ایردوان نال ٹیلی فون تے ڳالھ مہاڑ کیتی تے عید الفطر دے پرمسرت موقع تے انہاں دے نال ترکیہ دے بھرا عوام کوں آپݨی مبارخ ݙتی تے نیک خواہشات دا اظہار کیتے۔ وزیراعظم دفتر دے پریس ونگ موجب اڄوکے سال فروری اچ صدر ایردوان دے پاکستان دے تاریخی دورے کوں یاد کریندے وزیراعظم ݙوہیں ملکاں وچال ݙوپاسے تعلقات اچ مثبت رفتار تے اطمینان دا اظہار کیتے۔ انہاں اسلام آباد اچ ترکیہ۔پاکستان اعلیٰ سطحی تزویراتی تعاون کونسل دے ستویں اجلاس دے دوران ݙوہیں فریقین دی طرفوں کیتے ڳئے اہم فیصلیں تے وختی عمل درآمد یقینی بݨاوݨ دی لوڑھ تے زور ݙتا۔ ݙوہیں ملکاں وچال گھاٹے تاریخی تعلقات کوں اجاگر کریندے وزیراعظم آکھئے وے وݙٖے ماݨ دی ڳالھ اے جو ݙوہیں ملک ہمیشہ ھک ݙوجھے دے رلے کھڑے رہیے تے ݙوہیں ملکاں ہی بنیادی مفاد دے مسئلیں تے ھک ݙوجھے دا ساتھ ݙتے ۔ ݙوہیں رہنماواں علاقائی صورتحال تے وی ڳالھ مہاڑ کیتی ۔ صدر ایردوان عید الفطر تے نیک خواہشات تے وزیر اعظم دا شکریہ ادا کیتے پاکستانی عوام سانڳے انہاں جذبیں دا اظہار کیتے ۔ انہاں سارے اہم امور تے پاکستان سانڳے ترکیہ دی مستقل حمایت دا اعادہ کیتے۔
