عید دے موقع تے یتیماں، مسکیناں تے ضرورت منداں دا خاص خیال رکھیا ونڄے ،وزیراعلیٰ پنجاب مریم نواز

لاہور۔31مارچ(اے پی پی) وزیر اعلی پنجاب مریم نواز عید الفطر دے موقع تے قوم کوں مبارخ ݙیندے آکھئے عید الفطر اللہ تعالی دی طرفوں مسلماناں سانڳے ھک عظیم انعام تے یومِ تشکر اے۔ انہاں دعا منڳی جو پاکستان اچ خوشیاں دا سلسلہ ہمیشہ جاری رہے۔اپݨے سنھیے اچ وزیراعلی پنجاب آکھئے عید دا اصل مفہوم احساس اتے ایثار وچ ہے ، اتے اے اوں ویلھے حقیقی خوشی دا ݙینھ بݨسی جݙاں اساں سارے رل تے ایں کوں منیسوں ۔ انہاں عوام کوں ترغیب ݙتی جو عید دے موقع تے یتیماں، مسکیناں تے ضرورت منداں دا خاص خیال رکھیا ونڄےکیوں جو نبی کریم ۖ دا یتیم  ٻالاں نال شفقت بھریا سلوک ھک ابدی مثال اے۔ انہاں آکھئے عید دی خوشیاں اچ چھوٹے ملازمین اتے نادارلوکاں کوں رلاوݨ نہ صرف مستحسن عمل اے بلکہ ایں توں عید دیاں برکتاں دوبالا تھی ویندن ، انہاں خاص طور تے شہدا دے خانداناں کوں یاد رکھݨ تے انہاں نال اظہار یکجہتی کرݨ تے وی زور ݙتے۔ وزیراعلی عوام توں اپیل کیتی جو او آپݨے آسے پاسے محروم طبقے دی ضرورتاں کوں سمجھن اتے انہاں دی مدد کرن تاں جو عید دی حقیقی روح کوں اجاگر کیتا ونڄ سڳے۔ انہاں آکھئے جیڑھے لوک ݙوجھیں دی مدد کریندن اوہے حقیقی خوشی تے سکون گھندن۔