اسلام آباد۔31مارچ(اے پی پی) وزیراعظم محمد شہباز شریف میانمار اچ تباہ کن زلزلے تے ݙکھ تے افسوس کیتے ،میانماردی اعلیٰ قیادت سینئر جنرل من آنگ ہلینگ، چیئرمین سٹیٹ ایڈمنسٹریشن کونسل و وزیراعظم میانمارنال ٹیلیفونک ڳالھ مہاڑ کریندے انہاں میانماراچ 28 مارچ 2025 کوں آوݨ آلے تباہ کن زلزلے دے نتیجے اچ قیمتی جاناں تے املاک دے ضیان تے پاکستانی عوام اتے حکومت پاکستان دی طرفوں ݙکھ تے افسوس کیتے ۔ وزیراعظم دفتر میڈیا ونگ توں جاری اعلامیہ موجب عید الفطر دے موقع تے ٹیلی فون تے ڳالھ کریندے وزیر اعظم محمد شہباز شریف میانمار دے وزیراعظم کوں یقین ݙیوائے جو پاکستان زلزلہ توں متاثرہ لوکاں دی تکلیف گھٹ کرݨ سانڳے ہرقسم دی مدد کرݨ سانڳے تیار اے ۔ انہاں میانمار دے وزیراعظم کوں ݙسائے جو انہاں دی ہدایت تے نیشنل ڈیزاسٹر منیجمنٹ اتھارٹی تقریباً 70 ٹن امدادی سامان میانمار سانڳے روانہ کریسی تے ݙو کھیپ تے مشتمل امدادی سامان آندے 48 گھنٹے اچ زلزلہ توں متاثرہ لوکاں دی مدد سانڳے پڄ ویسی ۔وزیراعظم میانمار دے عوام دی بہادری اتے استقامت تے اعتماد دا اظہار کیتے تے امید ظاہر کیتی جو او وختی قدرتی آفت تے قابو پاگھنسن ۔میانمار دے وزیراعظم نے وزیراعظم محمد شہباز شریف اتے پاکستانی عوام دے حسن سلوک دی تعریف کیتی تے اوکھے ویلھے اچ میانمار دی عوام نال ساتھ کھڑے تھیوݨ تے اظہار تشکر وی کیتے۔
