اسلام آباد۔1اپریل(اے پی پی) وفاقی وزیر ڈاکٹر طارق فضل چوہدری میڈیا نال ڳالھ مہاڑکریندے آکھئے وزیراعظم دی ہدایت تے زلزلہ متاثرین سانڳے مجموعی طور تے70 ٹن امدادی سامان میانمارروانہ کیتا ویندا پئے۔ اے ڳالھ انہاں وزیرِاعظم پاکستان دی ہدایت تے این ڈی ایم اے دی طرفوں میانماراچ زلزلہ متاثرین سانڳے امدادی سامان دی ترسیل دے عمل دے آغاز اتے امدادی سامان روانگی دی تقریب دے موقع تے میڈیا نال ڳالھ مہاڑ کریندے آکھی ۔ نیشنل ڈیزاسٹر مینجمنٹ اتھارٹی (این ڈی ایم اے) دے ترجمان دی طرفوں جاری بیان موجب تقریب اچ وفاقی وزیر پارلیمانی امور ڈاکٹر طارق فضل چوہدری توں انڄ این ڈی ایم اے ، وزارت خارجہ دے اہلکاراں اتے میانمار دے سفیر وی شرکت کیتی۔ وفاقی وزیر ڈاکٹر طارق فضل چوہدری میڈیا نال ڳالھ کریندے آکھئے وزیراعظم دی ہدایت تے زلزلہ متاثرین سانڳے مجموعی طور تے 70 ٹن امدادی سامان میانمار روانہ کیتا ویندا پئے ۔ وزیراعظم اتے حکومتِ پاکستان ایں اوکھے ویلھے میانمار دی عوام دے رلے کھڑن ۔ وفاقی وزیر ڈاکٹر طارق فضل میڈیا نال ڳالھ اچ وزیراعظم شہباز شریف دی طرفوں میانمار دی عوام سانڳے اظہارِ ہمدردی دا خصوصی پیغام وی ݙتے۔ پاکستان دی طرفوں امدادی سامان دی پہلی کھیپ اچ 35 ٹن امدادی چیزاں شامل ہن جئیں اچ خیمے، ترپالاں، کمبل، تیار کھاݨا، دوائیں تے واٹرماڈیولز شامل ہن ، امداد بردار طیارہ میانمار دے شہر ینگون پُڄسی ۔ وفاقی وزیر وزیراعظم دی ہدایت تے وختی امدادی سامان دے ترسیلی عمل تے این ڈی ایم اے دی کاوش دی تعریف کیتی ۔ میانمار دے سفیر امدادی سامان دے اقدامات تے حکومت پاکستان تے پاکستانی عوام دا شکریہ ادا کیتے۔ 35ٹن امدادی سامان تے مشتمل پہلی کھیپ اڄ روانہ کیتی ویندی پئی اے جݙاں جو مزید 35 ٹن تے مشتمل ݙوجھی کھیپ وختی روانہ کیتی ویسی۔
