لاہور ۔2اپریل(اے پی پی) وزیراعظم محمد شہباز شریف عید الفطر دے موقع تے متحدہ عرب امارات دے صدر اتے ابوظہبی دے حکمران شیخ محمد بن زاید النہیان نال ٹیلی فون تے ڳالھ مہاڑ کیتی ۔ انہاں متحدہ عرب امارات دے صدر، اماراتی شاہی خاندان دے نال نال متحدہ عرب امارات دے بھرا لوکاں کوں عید دی مبارخ ݙتی تے انہاں دی مسلسل خوشحالی ، امن تے ترقی سانڳے دعا منڳی ۔ وزیراعظم دفتر دے میڈیا ونگ توں جاری بیان موجب وزیراعظم گزریل مہینے ابوظہبی اچ متحدہ عرب امارات دے صدر دے نال آپݨی ملاقات دا ذکر کیتے تے موجودہ پاکستان اماراتی تعلقات کوں فیدہ مند اقتصادی اشتراک اچ بدالݨ دا آپݨا پکا عزم کیتے۔ انہاں پاکستان سانڳے متحدہ عرب امارات دی پراݨی حمایت تے شکریہ ادا کیتے۔متحدہ عرب امارات دے صدر وی گرمجوشی نال عید دی مبارخ ݙتی تے پاکستانی عوام سانڳے نیک خواہشات دا اظہار کیتے۔ انہاں پاکستان دے اقتصادی اتے ترقیاتی اقدامات سانڳے متحدہ عرب امارات دی غیرمتزلزل حمایت دا اعادہ کیتے تے مختلف شعبیں اچ تعاون جاری رکھݨ دی اہمیت تے زور ݙتے۔
