اسلام آباد۔9اپریل(اے پی پی) وزیر اعظم محمد شہباز شریف آکھیے ملک دی معاشی ترقی سانقے برآمدات اچ ودھارا ضروری اے ، بجلی دیاں قیمتاں گھٹ تھیوݨ پاروں صنعتاں دی پیداواری لاگت گھٹ تھیسی،امریکہ نال تجارتی تعلقات دے ودھارے تے ٹیرف تے مذاکرات سانڳے پاکستان دا اعلی سطحی وفد بھیجا ویسی ۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی صدارت اچ اقتصادی مشاورتی کونسل دا اجلاس تھئے ۔ اجلاس اچ اقتصادی مشاورتی کونسل دے ارکان سودھے نائب وزیراعظم / وزیر خارجہ محمد اسحاق ڈار، وفاقی وزراء احد خان چیمہ، محمد اورنگزیب، عطاء اللہ تارڑ، شزہ فاطمہ خواجہ، علی پرویز ملک، سردار اویس خان لغاری، مشیران محمد علی، سید توقیر شاہ، وزیر مملکت بلال اظہر کیانی، معاون خصوصی ہارون اختر، گورنر سٹیٹ بینک جمیل احمد اتے متعلقہ اعلی حکام شرکت کیتی۔ اجلاس دے شرکا پاکستان دی معاشی ترقی بالخصوص برآمدات اچ ودھارے دے حوالے نال مستقبل دے لائحہ عمل تے تجویزاں پیش کیتیاں ۔ شرکا وزیراعظم کوں حکومت دی طرفوں صنعتاں کوں ݙتی ونڄݨ آلی بجلی دیاں قیمتاں اچ خاطر خواہ کمی تے خراج تحسین پیش کیتے۔ شرکا منرلز انویسٹمنٹ فورم دی خصوصی پذیرائی کیتی تے ایں کوں پاکستان دے معدنیات و کان کنی دے شعبے دی ترقی سانڳے اہم سنگ میل قرار ݙتے۔ شرکا حکومتی پالیسی سازی کوں خام مال دی بجائے ویلیو ایڈیشن اتے تیار مصنوعات دی برآمد تے توجہ ݙیوݨ دی تجویز ݙتی ۔ شرکا سامان دی صنعتاں توں بندرگاہواں تئیں ترسیل سانڳے مواصلاتی ڈھانچے کوں مزید تکڑا بݨاوݨ ، ملکی افرادی قوت کوں ݙتی ڳئی ہنر کوں بین الاقوامی معیار نال ہم آہنگ کرݨ، ٻاہرلے ملک پاکستانی سفارتخانیں دے ذریعے پاکستانی چیزاں دی تشہیر اچ بہتری، ایکسپورٹ پروموشنل کونسلز دے قیام، خصوصی اقتصادی زونز و صنعتی علاقیں اچ سہولتاں دی مزید بہتری دی تجویزاں پیش کیتن۔ شرکا قابل برآمد مصنوعات اتے انہاں دے خام مال دے حصول توں تیاری دے مرحلے دے حوالے نال جامع تحقیق دی تجویز پیش کیتی جیں تون پاکستانی صنعتکاراں کوں عالمی منڈی اچ مسابقت اتے برآمدات اچ ودھارے اچ مدد ملسی ۔ ایں توں انڄ شرکا پاکستان دے بینکنگ شعبے دی برآمدات اچ سہولت سانڳے اصلاحات دی تجویزاں پیش کیتن ۔ شرکا امریکہ دی طرفوں اڄوکے ٹیرف دے نفاذ دے معاملے تے مذاکرات سانڳے پاکستان دے اعلی سطحی وفد بھیجݨ دے فیصلے دی تعریف کیتی شرکا کونسل اچ ہر شعبے توں نمائندگی تے جامعیت دی تعریف کیتی ۔ وزیر اعظم حکومتی معاشی ٹیم کوں کونسل ارکان دی تجویزاں دے حوالے نال ھک قابل عمل ایکشن پلان بݨا تے پیش کرݨ دی ہدایت کیتی۔ وزیر اعظم اقتصادی مشاورتی کونسل دے تحت مختلف شعبہ جات دی انڄ انڄ ذیلی کمیٹیاں بݨاوݨ دی ہدایت کیتی جیڑھا جو انہاں شعبیں دے حوالے نلا قابل عمل تجویزاں بݨا تے پیش کریسن ۔ وزیراعظم آکھیے پاکستان دی معاشی ترقی سانڳے برآمدات ودھاوݨ ضروری اے ۔ آئی ایم ایف نال مذاکرات اتے انہاں کوں قائل کرݨ دے بعد بجلی دیاں قیمتاں دا سہرا معاشی ٹیم کوں ویندے ۔ مقامی صنعتاں دی پیداواری لاگت گھٹ کرݨ توں پاکستانی مصنوعات دی بین الاقوامی سطح تے مسابقت ممکن تھی سڳسی ،صنعتی ترقی حکومت دی اولین ترجیحات اچ شامل اے،صنعتی ترقی توں ملک اچ روزگار دے موقع ودھسن ۔ وزیراعظم آکھیے ماہرین دی تجویزاں توں معیشت اچ مزید بہتری گھن آندے پیوں ،جامع مشاورتی عمل توں پائیدار ترقی دے اہداف گھنݨ انشاء اللہ وختی ممکن تھیسی ،انفارمیشن ٹیکنالوجی، ٹیکس نظام دی ڈیجیٹائیزیشن توں اصلاحات دے ذریعے کاروبار و سرمایہ کاری اچ سوکھ ݙیندے پیوں ۔ وزیر اعظم آکھیے معیشت دا استحکام، مہانگ دی شرح گھٹ ، شرح سود اچ خاطر خواہ کمی، عالمی اداریں دے اعتماد اچ ودھارا تے دوست ملکاں توں سرمایہ کاری حکومتی معاشی ٹیم دی محنت دا ثمر اے۔ وزیراعظم آکھیے فیصلہ کیتے امریکہ نال تجارتی تعلقات دے مزید ودھارے تے ر ٹیرف تے مذاکرات سانڳے پاکستان دا اعلی سطح دا وفد بھیجا ویسی ،وفد اچ پاکستان دی معروف کاروباری شخصیات اتے برآمد کنندگان شامل ہوسن اقتصادی مشاورتی کونسل اچ شامل شعبے دے ماہرین اپݨی مفید تجویزاں توں ملکی ترقی اچ اہم کردار ادا کرن۔
