لاہور توں فیصل آباد ونڄݨ آلی شالیمار ایکسپریس ریل ڳاݙی حادثہ دا شکار، 25 مسافر زخمی تھی ڳئے، ترجمان ریلوے

فیصل آباد۔21مئی(اے پی پی) لاہور توں فیصل آباد ونڄݨ آلی شالیمار ایکسپریس ریل گاݙی حادثہ دا شکار، 25 مسافر زخمی تھی ڳئن۔ ریلوے ترجمان موجب تھاݨہ ساہیانوالہ دے علاقے 142 رب چھوٹی گھڑتل دے نیڑے ریلوے دے کچے پھاٹک تے مسافر بردار ریل گاݙی ٹریکٹر ٹرالی نال ٹکرا تے پٹڑی توں لہہ ڳئی۔ حادثے اچ ریل گاݙی ڈرائیور اَتے انہاں دے اسسٹنٹ سودھے 25 توں ودھ مسافر زخمی تھی ڳئن۔ شالیمارایکسپریس ریل گاݙی تقریباً 4 وڄے سویرے فیصل آباد توں لاہور ویندی پئی ہئی جو 142 رب چھوٹی گھڑتل دے نیڑے ریلوے دے کچے پھاٹک تے تیل ختم تھیوݨ پاروں پھتی سلھاں نال لݙی ٹریکٹر ٹرالی نال ٹکرا ڳئی، حادثہ ٹریکٹر دا تیل ختم تھیوݨ پاروں پیش آئے جیندے اچ ریل گاݙی ڈرائیور اَتے انہاں دے اسسٹنٹ سودھے 20 توں ودھ مسافر زخمی تھی ڳئن۔ ریل گاݙی دیاں 2 ٻوگھیاں ریلوے ٹریک توں تقریباً ہک کلومیٹر پرے تئیں لہہ ڳیاں ، واقعے دی اطلاع مِلݨ تے مقامی پولیس اَتے ریسکیو ٹیماں موقع تے پڄ ڳیاں۔ ریسکیو ٹیماں زخمی تھیوݨ آلیں کوں طبی امداد دے بعد ٹی ایچ کیو ہسپتال چک جھمرہ منتقل کر ݙتا۔ حادثے پاروں ساہیانوالہ توں سالار والہ تئیں دا ریلوے ٹریک ترٹݨ پاروں فیصل آباد توں لاہور اَتے وزیر آباد کیتے ساری ریلوے ٹریفک کوں مکمل طور تے بند کر ݙتا ڳئے۔ ترجمان طارق جٹ آکھیے جو فیصل آباد دے تھاݨہ ساہیانوالہ دے علاقے چھوٹی گھڑتل 142 رب پھاٹک دے نیڑے ریل گاݙی حادثے دے معاملے تے نوٹس گھن تے سی پی او فیصل آباد صاحبزادہ بلال عمر پولیس افسراں کوں وختی موقع تے پُڄݨ دیاں ہدایات ݙتیاں۔ متعلقہ پولیس ریلوے حکام نال رَل تے حادثے دی تحقیقات اچ مصروف ہن۔ ٹرالی ڈرائیور موقع توں بھڄ ڳئے مقامی پولیس ٹرالی اَتے ٹریکٹر کوں تحویل اچ گھن ڳھدے۔