خضدار اچ ہک ٻئے بزدلانہ حملے اچ سکول بس نشانہ، 3 معصوم طالبات سودھا 5 بندے شہید، آئی ایس پی آر

راولپنڈی۔مئی 21(اے پی پی) بلوچستان دے علاقے خضدار اچ ہک ٻئے بزدلانہ اتے دلخراش حملے اچ سکول دے ٻالاں دی بس کوں نشانہ بݨایا گیا، ایں حملے اچ 3 معصوم طالبات سودھا 5 بندے شہید تھی گئن، اے دہشت گردی بھارت دی منصوبہ بندی اتے سرپرستی اچ ایندے مقامی ایجنٹاں دے ذریعے کیتی گئی اے۔ آئی ایس پی آر دے مطابق میدان جنگ اچ ناکامی دے بعد، بھارت اپݨے ایجنٹاں کوں بلوچستان اتے خیبر پختونخوا اچ دہشت، بدامنی اتے انتشار پھیلاوݨ کیتے استعمال کرݨ شروع کر ݙتے، تاں جو پاکستان دے پرامن علاقیاں کوں عدم استحکام دا شکار کیتا ونڄ سڳے۔ ابتدائی اطلاعواں دے مطابق ایں افسوسناک واقعے اچ ترائے معصوم بال اتے ݙو شہری شہید تھئن جݙاں جو کئی بال زخمی تھئن۔ آپریشن “بنیان مرصوص” اچ شرمناک شکست اتے سکیورٹی فورسز دیاں مسلسل کارروائیاں نال بوکھلا تے بھارتی ریاست اپݨے دہشت گرد ایجنٹاں کوں پاکستان اچ سافٹ اہداف خاص کر معصوم بالاں اتے شہریاں کوں نشانہ بݨاوݨ کیتے استعمال کرݨ شروع کر ݙتے۔ آئی ایس پی آر دا آکھݨ اے جو دہشت گردی کوں بطور ریاستی پالیسی اپناوݨ بھارتی سیاسی حکومت دی پست ذہنیت اتے انسانی اقدار توں مکمل انحراف ظاہر کریندی اے، ایں بزدلانہ اتے بھارتی سرپرستی اچ تھیوݨ آلے دہشت گرد حملے دے منصوبہ سازاں، مددگاراں اتے مجرماں کوں کیفرِ کردار تئیں پچایا ویسی اتے بھارت دا مکروہ چہرہ دنیا دے سامݨے بے نقاب کیتا ویسی۔ آئی ایس پی آر دا آکھݨ اے جو پاکستانی مسلح افواج پوری پاکستانی قوم دی حمایت نال ملک توں بھارتی سرپرستی اچ تھیوݨ آلی دہشت گردی دی ہر شکل کوں جڑ توں مکاوݨ کیتے پرعزم ہن۔