دورہ چین ٻہوں کامیاب رہیے، پاکستان سفارتی، سٹریٹجک تے اقتصادی محاذاں تے نشابر پیش رفت حاصل کیتی اے،نائب وزیراعظم تے وزیر خارجہ سینیٹر محمد اسحاق ڈار دا ترائے ڈینھ دے دورہ چین دے بعد پریس کانفرنس نال خطاب

اسلام آباد، 22 مئی (اے پی پی) نائب وزیراعظم تے وزیر خارجہ سینیٹر محمد اسحاق ڈار آپنڑیں اڄوکے ترائے ڈینھ دے دورہ چین کوں “انتہائی کامیاب” قرار ڈیندیں ہوئیں آکھیا جو پاکستان بیجنگ وچ تھیوݨ آلی مصروفیات اچ سفارتی، سٹریٹجک تے اقتصادی محاذاں تے نمایاں پیش رفت حاصل کیتی اے۔ خمیس کوں پریس کانفرنس نال خطاب کریندیں ہوئیں انہاں آکھیا جو اے کوئی معمول دی سفارتی مصروفیات کائناں ہن بلکہ واضح تے فوری مقاصد دے نال ہن جئیں اچ چینی قیادت نال ڈو پاسہ ملاقاتاں تے افغانستان بارے سہ فریقی مذاکرات وی شامل ہن۔نائب وزیراعظم آکھیا جو چین اتے افغانستان ڈوہیں نال ہک واضح معاہدہ طے تھی گئے جو کہیں وی دہشت گرد تنظیم کوں، چاہے او ٹی ٹی پی ہووے، بی ایل اے یا بئی کوئی، کہیں وی ملک دی سرزمین کوں ڈوجھے دے خلاف استعمال کرݨ دی اجازت کائناں ڈتی ویسی۔ انہاں آکھیا جو سی پیک دے ڈوجھے مرحلے تے تفصیلی تے امید افزاء گالھ تھئی اے۔ سینیٹر محمد اسحاق ڈار آکھیا جو اساں بیلٹ اینڈ روڈ انیشیٹو دے تحت وسیع تعاون کیتے کامیابی نال بنیاد رکھی اے۔ انہاں آکھیا جو چین پاکستان-افغانستان-ازبکستان ریلوے منصوبے دی مالی معاونت دے آپݨیں ارادے دا اظہار کیتا اے تے اینکوں علاقائی رابطے کیتے ہک تبدیلی دا قدم قرار ڈتا ۔نائب وزیراعظم آکھیا جو اساں پہلے ای ازبکستان تے افغانستان کوں ہک مسودہ فریم ورک بھیج ڈتے جڈاں جو اجلاس کیتے 29 تے 30 مئی دی تجویز اے، میں جون دے شروع تئیں اینکوں چھیکڑی شکل ڈیوݨ کیتے پرعزم ہاں۔ انہاں آکھیا جو ایں منصوبے کیتے فنانسنگ تے کوآرڈینیشن براہ راست چین نال کیتی گئی اے جئیں مثبت جواب ڈتے، اے منصوبہ پشاور-کابل ہائی وے تے ایم ایل ون دی اپ گریڈیشن دے نال وسط ایشیائی جمہوریاں توں پاکستان دے رابطے کوں ودھاوݨ تے ساڈیاں گھٹ استعمال تھیوݨ آلی بندرگاہیں دی تجارتی صلاحیت کوں ودھیسی۔انہاں آکھیا جو ایں دورے اچ چین تے افغانستان نال خاص طور تے پناہ گزیناں دے معاملیاں تے انسداد دہشت گردی بارے اہم فیصلے وی تھئے۔ انہاں آکھیا جو 17 اپریل کوں کابل وچ تھیوݨ آلے اجلاس اچ کیتے گئے سارے فیصلیاں تے 72 گھنٹے دے اندر عمل درآمد کر ڈتا ڳئے۔ سکیورٹی تعاون دا ذکر کریندیں ہوئیں سینیٹر محمد اسحاق ڈار آکھیا جو چین کوں پاکستان وچ آپݨیں اہلکاراں تے حملیاں تے تشویش اے، میں انہاں کوں یقین ڈیوایا جو اساں انہاں خطرات نال سنجیدگی نال نبڑدے پئیوں، اساں سرحد پار دہشت گردی کوں روکݨ کیتے ہک مستقل طریقہ کار تے ڳالھ کیتی۔ انہاں آکھیا جو میں آپنڑیں زیرو ٹالرنس موقف نال ہم آہنگ تھیوݨ تے چین تے افغانستان ڈوہاں دی تعریف کرینداں۔ انہاں آکھیا جو پاکستان دی سابقہ حکومت اچ 2013 توں 2017 تئیں آپریشن ضرب عضب تے 4 ارب ڈالر توں ودھ خرچ کیتے گئے جئیں نال دہشت گردی کوں موثر طریقے نال کچل ڈتا گیا۔ انہاں آکھیا جو بدقسمتی نال پچھلی حکومت دی کمزور سرحدی پالیسیاں تے کٹر دہشت گرداں دی رہائی پاروں حالات خراب تھئے، ہݨ ساڈا عزم واضح اے جو اساں دہشت گردی کوں آہنی ہتھاں نال کچل ڈیسوں جیڑھا جو اساں پہلے کیتا ہا۔نائب وزیراعظم خضدار بس حملے دے متاثرین کیتے چین دی تعزیت دا وی حوالہ ڈتا تے آکھیا جو انصاف دی جلدی فراہمی کیتی ویسی۔ انہاں ایں گالھ تے زور ڈتا جو چینی قیادت سارے بنیادی معاملیاں تے پاکستان دے نال کھڑی اے، انہاں ساڈی خودمختاری تے علاقائی سالمیت کیتے آپݨی حمایت کیتی اے، کشمیر تے پاکستان دے موقف دی مضبوطی نال حمایت کیتی اتے اقوام متحدہ دی سلامتی کونسل دیاں قرار داداں دے مطابق مسئلے دے حل دا مطالبہ کیتا۔ نائب وزیراعظم آکھیا جو اساں تبت سمیت ون چائنا پالیسی کیتے آپنڑیں حمایت کیتی اے۔ نائب وزیراعظم آکھیا جو پاک چین سفارتی تعلقات دی 74 ویں سالگرہ دے موقع تے انہاں چین کوں مبارکباد ڈتی تے بیجنگ وچ منعقدہ پہلے دور دے بعد پاک چین سٹریٹجک ڈائیلاگ دے ڈوجھے دور کیتے چینی حکام کوں اسلام آباد آوݨ دی دعوت ڈتی۔سینیٹر محمد اسحاق ڈار آکھیا جو چینی وزیر برائے بین الاقوامی ترقی تے کمیونسٹ پارٹی دے سینئر رہنما نے انہاں دے رلے ونجݨ آلے وفد نال ملاقات کیتی تے پاکستان دی عالمی سطح تے رسائی دی تعریف کیتی۔ انہاں چین دی میزبانی وچ ہک گلوبل پولیٹیکل پارٹیز فورم دے قیام دی تجویز پیش کیتی۔ نائب وزیراعظم آکھیا جو میں انہاں کوں ݙسیا جو اساڈی پارٹی قیادت 24 مئی توں شروع تھیوݨ آلی اگلی گالھ مہاڑ اچ پاکستان دی نمائندگی کیتے پاکستان مسلم لیگ (ن) دے ہک سینیٹر کوں بھیجݨ دا فیصلہ کیتے۔نائب وزیراعظم تے وزیر خارجہ سینیٹر محمد اسحاق ڈار علاقائی سلامتی دے ماحول دا ذکر کریندیں ہوئیں آکھیا جو اساں کامیابی نال خاص طور تے 2019 دے واقعات بارے بھارتی بیانیے دا مقابلہ کیتا، اساں پہلگام واقعے دی بین الاقوامی تحقیقات دی پیشکش کیتی جینکوں بھارت مسترد کر ڈتا، ساڈی شفافیت پاکستان دی ساکھ کوں مضبوط کیتا تے بین الاقوامی برادری حقائق دی تصدیق دے بعد اساڈے موقف دی تائید کیتی۔ انہاں بھارتی حملیاں دی مذمت کریندیں ہوئیں آکھیا جو اڄوکے تنازعہ اچ 75 بھارتی طیارے بھیجے گئے، 24 پے لوڈز سٹیے گئے اتے کئی طیارے بشمول رافیلز تے یو اے ویز کوں پاکستان مار سٹیا۔ انہاں آکھیا جو اساں بزدلاں وانگوں نئیں بلکہ ہک ذمہ دار تے خودمختار قوم دے طور تے ڈینھ دی روشنی اچ اقوام متحدہ دے چارٹر دے تحت جواب ݙتا۔ انہاں آکھیا جو امریکی وزیر خارجہ روبیو دی کال دے بعد ثالثی وچ طے تھیوݨ آلا جنگ بندی معاہدہ برقرار اے تے اے جو ڈی جی ایم اوز دے ذریعے ملٹری ٹو ملٹری انگیجمنٹس آسانی نال اڳوں ودھدی پئن۔نائب وزیراعظم آکھیا جو اساڈی ڈیٹرنس دفاعی اے، جارحانہ کائناں، اساں کڈاہیں وی آپنڑیں جوہری ہتھیار تے میزائل ڈوجھیاں تے حملہ کرݨ کیتے نی ٻݨائے بلکہ امن دی حفاظت کیتے ٻݨائن۔ انہاں بھارتی وزیر دفاع دے اڄوکے ریمارکس کوں افسوسناک قرار ڈیندے ہوئیں آکھیا جو پاکستان امن دا خواہاں اے جڈاں جو چیلنج کیتا ڳئے تاں اساں آپنڑیں خودمختاری دا ہمیشہ پوری طاقت نال دفاع کریسوں۔محمد اسحاق ڈار افغانستان نال تعلقات کوں بہتر ٻݨاوݨ کیتے آپݨیں حکومت دے عزم کوں اجاگر کریندیں ہوئیں آکھیا جو افغانستان نال اساڈے مذہبی، ثقافتی، تاریخی تے جغرافیائی تعلقات ہن، افغان معاشرے اچ ساڈی رسائی دا خیرمقدم کیتا ڳیا، اساکوں ناظم الامور دی سطح توں اڳوں ودھݨ تے خاطر خواہ مشغول تھیوݨ دی لوڑھ اے۔ انہاں افغان ڈرائیوراں تے گڈیاں کیتے ٹرانزٹ دستاویز دے نظام وچ 30 جون تئیں توسیع دا اعلان کیتا تے افغان شہریاں کیتے 100 ڈالر دے ملٹی پل انٹری ویزا دا سنگل دستاویز دا نظام متعارف کرایا۔ انہاں آکھیا جو افغان حکام ولوں انہاں اقدامات دی تعریف کیتی۔نائب وزیراعظم فیلڈ مارشل عاصم منیر کوں انہاں دی ترقی تے مبارکباد ڈتی تے اینکوں قومی سلامتی دیاں مصروفیات اچ انہاں دی غیر معمولی قیادت تے تعاون کیتے ہک “مناسب پذیرائی” قرار ڈتا۔ نائب وزیراعظم آکھیا جو پاک بھارت کشیدگی اچ قطر جیڑھے ملکاں دے رہنماواں سودھے ہم منصباں کوں پاکستان دا نقطہ نظر پیش کرݨ کیتے 60 توں ودھ کالز کیتن۔ انہاں آکھیا جو دنیا ہݨ اساڈے موقف کوں سمجھدی پئی اے، پاکستان دہشت گردی دے خلاف صرف ہک فرنٹ لائن ریاست ہی نئیں بلکہ ایندا سب توں وڈا متاثرہ ملک اے جئیں وچ 85,000 توں ودھ جاناں ضائع تھین اتے اینکوں 150 ارب ڈالر دا معاشی نقصان تھیا۔