بھارت دی سرپرستی اچ 20 سالاں توں جاری ریاستی دہشت گردی دے ٹھوس شواہد پیش: ڈی جی آئی ایس پی آر

اسلام آباد، 23 مئی(اے پی پی)ڈی جی آئی ایس پی آر لیفٹیننٹ جنرل احمد شریف چوہدری بھارت دی سرپرستی اچ 20 سالاں توں جاری ریاستی دہشت گردی ٹھوس اتے جامع شواہد نال بے نقاب کریندے آکھیے جو بلوچستان خآص کر سانحہ خضدار اچ ‘فتنہ الہندوستان’ ملوث اے، بھارت آپݨی دہشت گرد پراکسیز ‘فتنہ الہندوستان’ اتے ‘فتنہ الخوارج’ دے ذریعے خطے اتے پاکستان اچ عدم استحکام کھنݙاوݨ چاہندے، “اساں انہاں پراکسیز دے گٹھ جوڑ کوں تروڑ تے انہاں دے مذموم عزائم ناکام بنڑا ݙیسوں۔” انہاں اے ڳالھ جمعہ کوں وفاقی سیکرٹری داخلہ کیپٹن (ر) خرم آغا دے کٹھے پریس کانفرنس اچ آکھی۔ ڈی جی آئی ایس پی آر احمد شریف چوہدری پریذینٹیشن ݙیندے 20 سال توں بھارتی سرپرستی اچ جاری دہشت گردی بارے حقائق میڈیا دے اڳو رکھین۔ انہاں آکھیا جو پاکستان دے قیام توں ہݨ تئیں بھارت دی دہشت گردی جاری اے، 1947ء اچ دہشت گرد تنظیم ‘مکتی باہنی’ وجود اچ آئی، بھارت پاکستان اتے بنگلہ دیش اچ دہشت گردی کیتے تنظیم ٻݨائی ڳئی اتے اے سلسلہ جاری رہے۔ انہاں آکھیا جو 2009 اچ حکومت پاکستان شرم الشیخ اچ اوں ویلھے دے بھارتی وزیراعظم کوں ناقابل تردید ثبوت دے نال ڈوزیئر حوالے کیتا ہا۔ انہاں کلبھوشن یادیو دی گرفتاری اتے اوندے اعترافات دا وی ذکر کیتا، جیندے اچ بھارتی حکومت دی سرپرستی اتے فنڈز دی فراہمی بارے اعتراف کیتا گیا۔ ڈی جی آئی ایس پی آر بلوچستان اچ ہک درجن توں ودھ افسوسناک واقعات دا حوالہ ݙیندے آکھیا جو ‘فتنہ الہندوستان’ دے دہشت گرداں ولوں معصوم لوکاں، مزدوراں، مسافراں، اتے ٻالڑیاں کوں وی وی نشانہ ٻݨایا ڳئے۔ انہاں خضدار دے سانحہ کوں بھارت دے حکم تے ‘فتنہ الہندوستان’ دے دہشت گرداں دی کارروائی قرار ݙیندے آکھیا جو 25 اگست کوں جہلم اچ پکڑیے گئے ہک دہشت گرد دے موبائل توں ملݨ آلے ثبوتاں توں پتہ لڳدے جو بھارتی حاضر سروس افسر میجر سندیپ براہ راست دہشت گردی اچ ملوث ہئی۔ احمد شریف چوہدری بھارت کوں چیلنج کیتا جیکر اوندے کولو پاکستان دے خلاف دہشت گردی اچ ملوث تھیوݨ دے ثبوت ہین تاں او سامݨے گھن آوے۔ انہاں 6 اتے 7 مئی کوں بھارتی فوج دے مسیتاں تے حملیاں دی مذمت کیتی اتے آکھیا جو ایں حملے اچ 7 خواتین اتے 15 ٻالڑیاں سودھ 40 معصوم شہری شہید تھئن۔ انہاں آکھیا جو پاکستان اچ میڈیا آزاد اے جݙاں جو بھارت اچ نام نہاد جمہوریت میڈیا نال جیڑھا کھلواڑ کیتے ایندے بارے پورا ڄڳ جاݨ چکیے۔ انہاں آکھیا جو دہشت گرد اسلم اچھو بھارتی ہسپتال اچ زیر علاج اے، بی ایل اے دے کارندے بشیر زیب کوں بھارت افغانستان دا پاسپورٹ ݙتے اتے فتنہ الہندوستان دا سرغنہ خلیل چیئرمین بھارت اچ اے، اتے فتنہ الخوارج دے سرغنہ ملک فریدون بھارت اچ زیر علاج اے۔ انہاں آکھیا جو بھارتی انٹیلی جنس ایجنسیاں لکھاں سوشل میڈیا اکائونٹس چلیندیاں پئن جیڑھے ‘فتنہ الخوارج’ دی حمایت کریندن۔ سیکرٹری داخلہ کیپٹن (ر) خرم آغا 21 مئی کوں خضدار اچ سکول بس تے تھیوݨ آلے دہشت گرد حملے دی سخت مذمت کیتی جیندے اچ 6 ٻالڑیاں سودھا 7 افراد شہید اتے 31 زخمی تھئن۔ انہاں آکھیا جو ابتدائی تحقیقات توں ثابت تھئے جو ہر واقعہ بھارت دی سرپرستی اچ ‘فتنہ الہندوستان’ دے ذریعے وݙے تشدد دیاں کارروائیاں دا حصہ اے۔ انہاں واضح کیتا جو پاکستان دے عوام انہاں کوں کامیاب نا تھیوݨڑ ݙیسن۔ ڈی جی آئی ایس پی آر صحافیاں دے سوالاں دا ولدا ݙیندے آکھیا جو بھارتی دہشت گرد پراکسیز نال نٻݨݨ کیتے بھارتی جارحیت دے بعد آپریشن بنیان مرصوص جھیں ݙکھائے گئے عزم دی لوڑھ اے۔ انہاں آکھیا جو بھارت دی فرسٹریشن اتے مایوسی دی وجہ اے جو پاکستان پچھلے ݙو سالاں توں دہشت گرداں دے خلاف کارروائیاں کر کے انہاں تے ڄاہ تنگ کرݙتی اے۔ انہاں بلوچستان دی سماجی و معاشی ترقی تے الایا جیندے اچ ریکوڈک دے آپریشنل تھیوݨ، کثیر ملکی شراکت داراں دی آمد، بلیو اکانومی تے معاہدے، گرین انیشی ایٹو دے تحت اقدامات، اتے لکھاں ایکڑ اراضی کوں قابل کاشت ٻݨاوݨ شامل اے۔ انہاں آکھیا جو گوادر بندرگاہ اتے گوادر انٹرنیشنل ایئرپورٹ فعال ہن، اتے بلوچستان دے 73 ہزار طلباء صوبائی حکومت دے سکالرشپس تے تعلیم حاصل کریندے پئین۔ سیکرٹری داخلہ کیپٹن (ر) خرم آغا آکھیا جو پشاور اچ سانحہ اے پی ایس دے بعد آپریشن ضرب عضب شروع کیتا گیا اتے دہشت گردی دے واقعات اچ نمایاں کمی آئی۔ انہاں آکھیا جو نیشنل ایکشن پلان کوں ول ٻݨایا ویندا پئے اتے دہشت گرداں دے خاتمے کیتے آپریشن جاری اے۔ ڈی جی آئی ایس پی آر آکھیا جو نیشنل ایکشن پلان دے 13 نکات ہن جنہاں تے عمل کیتا ویندا پئے۔ انہاں میڈیا کوں دہشت گرداں دے بدکردار چہرے بے نقاب کرݨ دی درخواست کیتی اتے آکھیا جو بھارت دی اجارہ داری دی خواہش اے جو او پاکستان اتے خطے اچ عدم استحکام پیدا کرے۔ انہاں کرتارپور راہداری دے معاملے دا وی ذکر کیتا اتے آکھیا جو پاکستان اے راہداری کھولی ہوئی اے جݙاں جو بھارت سکھاں کوں آوݨ نی ݙیندا پیا۔