حکومت کھنڈ دی مقررہ قیمت تے عملدرآمد یقینی بݨیسی، مل مالکان کوں پیش آوݨ آلے مسئلیں دے حل کیتے اقدامات چاتے ویندے پئن، رانا تنویر حسین

لاہور۔ 24 مئی (اے پی پی) وفاقی وزیر نیشنل فوڈ سکیورٹی اینڈ ریسرچ، رانا تنویر حسین آکھیِے حکومت کھنڈ دی مقررہ قیمت تے عملدرآمد یقینی بݨیسی، مل مالکان کوں پیش آوݨ آلے مسئلیں دے حل کیتے وختی اقدامات چاتے ویندے پئن ۔ اے ڳالھ انہاں پاسکو ہیڈ آفس اچ کھنڈ دیاں قیمتاں دے حوالے نال منعقدہ اجلاس دی صدارت کریندے آکھی۔ ایں موقع تے ڈی جی فوڈ پنجاب، کین کمشنر پنجاب محمد شعیب خان جدون سودھے ٻئے وی موجود ہن۔ اجلاس اچ سارے صوبیں اچ کھنڈ دیاں قیمتاں دے تعین کیتے تجویزاں تے غور تھئے ۔ وفاقی وزیر مقرر کیتیاں ڳیاں کھنڈ دیاں قیمتاں تے عملدرآمد نہ تھیوݨ تے ٻہوں فِکر دا اظہار کیتا اتے آکھیِے حکومت کھنڈ دیاں مقررہ قیمتاں تے عملدرآمد یقینی بݨاوݨ کیتے پکے اقدامات کریندی پئی اِے۔ انہاں آکھیے آندے سنوار کوں ڈپٹی وزیراعظم اسحاق ڈار کھنڈ دے مل مالکان نال ملاقات کرتے قیمتاں تے عملدرآمد کوں یقینی بݨیسن۔ اجلاس اچ وفاقی وزیر رانا تنویر حسین کوں بریفنگ اچ ݙسیا ڳئِے گزریل سال دے مقابلے اچ ایں سال کھنڈ دی وِکری اچ وادھا تھئِے۔ وفاقی وزیر ہدایت کیتی اے جو کھنڈ دے سٹاک دا وی نویں سروں جائزہ ڳھدا ونڄے تاں جو مارکیٹ اچ قیمتاں کوں مستحکم رکھیا ونج سڳے۔