ٹیکنالوجی دا انضمام عدالتی نظام کوں ودھ قابل رسائی، شفاف اتے موثر ٻݨیسی، چیف جسٹس یحییٰ آفریدی دا تقریب نال خطاب

اسلام آباد۔26 مئی(اے پی پی(چیف جسٹس آف پاکستان جسٹس یحییٰ آفریدی آکھیے جو عدالتی نظام اچ ٹیکنالوجی دا انضمام صرف جدیدیت ہی نئیں عدالتاں کوں وی ودھ قابل رسائی، شفاف اتے موثر بناوݨ کیتے ضروری اے۔ سپریم کورٹ دے شعبہ تعلقات عامہ دے جاری اعلامیہ دے مطابق، انہاں اے ڳالھ قانون و انصاف کمیشن آف پاکستان ولوں سمپوزیم “پاکستان دے عدالتی نظام اچ ٹیکنالوجی دا استعمال: امکانات اتے وعدے” نال خطاب اچ آکھی۔ سمپوزیم اچ ججز، بین الاقوامی ماہرین اتے اعلیٰ سرکاری حکام شرکت کیتی۔ جج سپریم کورٹ آف پاکستان جسٹس شاہد وحید پاکستان دے عدالتی نظام اچ انفارمیشن ٹیکنالوجی دی ترقی اتے ارتقاء دا جائزہ پیش کیتا جیندے اچ پار کیتے ڳئے اہداف اتے موجودہ ڈھانچہ جاتی چیلنجز کوں اڳونہا کیتا گیا۔ سمپوزیم اچ بین الاقوامی ماہرین دی آراء وی شامل ہئی جیندے اچ چین دی سپریم پیپلز کورٹ دی ماہر لی شیائو ہوئی چین دے عدالتی اصلاحاتی ڈیجیٹل سفر شیئر کیتا۔ ریکٹر استنبول ٹیکنیکل یونیورسٹی ترکی پروفیسر ڈاکٹر حسن مندل عالمی تناظر اچ عدالتاں اچ ٹیکنالوجی دے اطلاق دا ݙسایا۔ غازی یونیورسٹی ترکی دے پروفیسر ڈاکٹر چیتن الماس عدالتی نظام اچ مصنوعی ذہانت (اے آئی) دے ودھدے کردار تے الایا۔ وفاقی سیکرٹری انفارمیشن ٹیکنالوجی و ٹیلی کام ضرار ہشام خان پاکستان دے ڈیجیٹل انفراسٹرکچر دے منصوبے ݙسائے اتے عدالتی شعبے اچ تبدیلی کیتے ادارہ جاتی تعاون تے زور ڈتا۔ اپݨے کلیدی خطاب اچ چیف جسٹس آف پاکستان جسٹس یحییٰ آفریدی سمپوزیم کوں ویلھے تے قرار ݙتا جیڑھا قومی عدالتی پالیسی ساز کمیٹی (این جے پی ایم سی) دے آندے اجلاس دے اصلاحاتی ایجنڈے دے عین مطابق اے۔ چیف جسٹس یحیٰ آفریدی جسٹس محمد علی مظہر، جسٹس شاہد وحید، جسٹس علی باقر نجفی (ججز سپریم کورٹ آف پاکستان)/چیئرمین و ممبران نیشنل جوڈیشل آٹومیشن کمیٹی (این جے اے سی) اتے قانون و انصاف کمیشن آف پاکستان (ایل جے سی پی) دی قیادت اچ ایں اقدام دی تعریف کیتی اتے بین الاقوامی مہماناں کوں خوش آمدید آہدے چینی سپریم پیپلز کورٹ دے چیف جسٹس جسٹس ژانگ جن اتے ترکی دی آئینی عدالت دے چیف جسٹس جسٹس قادر اوزکایا دے مسلسل تعاون اتے عدالتی اشتراک تے شکریہ ادا کیتا۔ اصلاحاتی اقدامات تے الیندے چیف جسٹس سپریم کورٹ اچ متعارف کروایاں ڳیاں ڈیجیٹل اختراعات جیویں ای-فائلنگ، فیصلیاں تے کیو آر کوڈز، ویڈیو لنک سماعتاں دی توسیع، شہری رائے دے پورٹل اتے مقدمیاں دی نگرانی کیتے ڈیٹا اینالٹکس دے استعمال دا ݙسایا اتے اے ڳالھ منی جو ڈیجیٹل خلیج، بدلدے قانونی ڈھانچے اتے سائبر سکیورٹی دے خطرات ہݨ وی اہم چیلنجز ہین۔ انہاں زور ڈتا جو ٹیکنالوجی اچ مزاحمت اصلاحات دی راہ اچ رکاوٹ نئیں ٻݨݨی چاہیدی اتے ہک جامع قومی فریم ورک اپنیدے ہوئے عدالتی ڈیجیٹل تبدیلی دی رہنمائی کیتی ونڄے جیندے اچ مضبوط سائبر سکیورٹی پروٹوکولز، اے آئی دے استعمال کیتے اخلاقی رہنما اصول اتے اعلیٰ عدالتاں، عدالتی اکیڈمیاں، سرکاری اداریاں، تعلیمی اداریاں اتے قانونی برادری وچال تعاون دا کلچر شامل ہووے۔ انہاں سارے سٹیک ہولڈرز توں اپیل کیتی جو او اتحاد اتے عزم نال اڳو تے ودھن تاں جو ہک اینڄھا عدالتی نظام ٻݨایا ونجے جیڑھیاں اڄوکیاں لوڑھ کوں پورا کرے اتے آوݨ آلیاں نسلاں دا اعتماد ڳھنے۔