مسلسل ویکسی نیشن مہم نال پولیو دے کیساں اچ 99 فیصد ڳھٹکی تھئی اے ، جاناں قربان کرݨ آلے پولیو ورکرز اتے سکیورٹی اہلکاراں کوں خراج عقیدت پیش کریندوں، صدر مملکت

اسلام آباد۔27 مئی (اے پی پی) صدر مملکت آصف علی زرداری آکھیا جو مسلسل ویکسی نیشن مہم نال پولیو دے کیساں اچ 99 فیصد ڳھٹکی تھئی اے ، جاناں قربان کرݨ آلے پولیو ورکرز اتے سکیورٹی اہلکاراں کوں خراج عقیدت پیش کریندوں۔ اساکوں پولیو ورکرز دے تحفظ کوں یقینی بݨاوݨا ہوسی، ایں ویلھے تئیں سکھ نال نہ ٻہسوں جئیں تئیں پولیو دا مکمل خاتمہ نہ تھی ونجے۔ منگل کوں ایوان صدر دے پریس ونگ موجب صدر مملکت پولیو دے خاتمے کیتے ملک گیر مہم تے اپݨے سنیھے اچ آکھیا جو 26 مئی توں یکم جون تئیں پاکستان ہک ملک گیر پولیو ویکسی نیشن مہم شروع کیتی اے، پولیو مہم دا ہدف پنج سال توں گھٹ عمر دے 4 کروڑ 54 لکھ بالاں کوں حفاظتی قطرے پلاوݨ اے۔ صدر مملکت آکھیا جو ایں مہم اچ 4 لکھ توں ودھ ورکرز اساݙے شہراں، وستیاں اتے دور دراز وادیاں اچ گھر گھر ونڄ تے زندگی بچاوݨ آلے پولیو دے قطرے پلیسن، اساݙی ایں مہم دا مقصد پولیو دا مکمل خاتمہ اتے قوم دا صحت مند مستقبل یقینی بݨاوݨ اے۔ صدر آصف علی زرداری والدین توں اپیل کیتی جو او پولیو ورکرز کیتے آپݨے دروازے کھولن اتے اپݨے بالاں کوں اے زندگی بخش قطرے ضرور پلاون۔ صدر مملکت آکھیا جو اساکوں ویکسین بارےغلط فہمیاں کوں دور کرݨا ہوسی، میں استاداں، علمائے کرام اتے کمیونٹی توں درخواست کرینداں جو ایں مقصد دی حمایت کرن، غلط فہمیاں دا خاتمہ کرن اتے لوکاں اچ اعتماد پیدا کرن۔ انہاں میڈیا توں اپیل کیتی جو لوکاں اچ آگاہی پیدا کرے جو پولیو ویکسین محفوظ، موثر اتے اساݙا ساریاں توں طاقتور ہتھیار اے۔ صدر مملکت آکھیا جو میں آپݨی دھی اتے خاتون اول آصفہ بھٹو زرداری دی مکمل حمایت کرینداں جنہاں دی جدوجہد اتے موثر مہم پولیو دے خلاف جنگ کوں تکھا کیتا، آصفہ بھٹو زرداری دی والدین، ذی اثر سماجی شخصیات اتے نینگراں توں اپیل اساکوں یاد ݙویندی اے جو پولیو دا خاتمہ اساݙی سانجھی ذمہ واری اے۔ صدر مملکت آکھیا جو 90 دی دہائی توں ہݨ تئیں پاکستان پولیو دے خلاف شاندار پیش رفت کیتی اے۔ انہاں نوشکی اچ پولیو ٹیم تے تھیوݨ آلے حملے دی مذمت کیتی اتے حملے اچ شہید تھیوݨ آلے پولیس اہلکار دے لواحقین نال تعزیت کیتی۔ صدر مملکت آکھیا جو میں انہاں بہادر پولیو ورکرز کوں خراج تحسین پیش کرینداں جو ہر بال تئیں پڄݨ کیتے آپݨیاں جاناں دا خطرہ مول ڳھندن۔ صدر مملکت آکھیا جو مسلسل ویکسی نیشن مہم، موثر نگرانی، ہیلتھ ورکرز دی جرات دے نتیجے اچ پولیو دے کیساں اچ 99 فیصد توں ودھ ڳھٹکی تھئی اے، پولیو دے خلاف جنگ اڄاں مُکّی کائنی، 2024 اچ پولیو کیساں اچ ودھارا ایں ڳالھ دا اشارہ اے جو اساکوں آپݨیاں کوششاں ٻعی تکھی کرݨی پوسن۔ انہاں آکھیا جو دور دراز علاقے اتے نقل مکانی کرݨ آلے لوکاں تئیں رسائی ہݨ وی ہک چیلنج اے، اساکوں ویکسی نیشن دی شرح کوں اوچی سطح تے برقرار رکھݨا ہوسی تاں جو وائرس دا مکمل خاتمہ ممکن تھی سڳے، اساں اوں ویلھے تئیں سکھ نال نہ ٻہسوں جئیں تئیں پولیو دا مکمل خاتمہ نہ تھی ونجے۔ صدر مملکت آکھیا جو میکوں یقین اے جو سارے رل تے پاکستان کوں پولیو توں پاک بݨا سڳدوں، آؤ، ہر بال کوں ویکسین ݙیووں اتے آپݨی قوم کوں ایں مفلوج کر ݙیوݨ آلے وائرس توں بچاؤ۔