پاکستان دی قابض اسرائیلی حکومت دے اشتعال انگیز اقدامات دی مذمت

اسلام آباد۔27 مئی (اے پی پی) پاکستان قابض اسرائیلی حکومت اتے غیر قانونی آباد کاراں دے اڄوکے اشتعال انگیز اقدامات دی سخت ترین لفظاں وچ مذمت کیتی اے، جنہاں دا مقصد مسجد اقصیٰ دی مذہبی، تاریخی اتے قانونی حیثیت کوں نقصان پڄاوݨ اے۔ ترجمان دفتر خارجہ دے منگل کوں جاری بیان اچ آکھیا ڳیا جو ایجھے اقدامات ناقابل قبول ہن اتے بین الاقوامی قانون دی صریح خلاف ورزی ہن، ایں نال خطے اچ پہلے توں غیر مستحکم صورتحال ٻئی خراب تھیوݨ دا امکان اے۔ ترجمان آکھیا جو پاکستان مقدس مقامات دے تقدس اتے تاریخی حیثیت کوں برقرار رکھݨ اتے اسرائیل کوں ٻئی اشتعال انگیزی توں روکݨ دا مطالبہ کریندے۔بیان موجب، پاکستان قابض طاقت ولوں غزہ اچ فلسطینی شہریاں کوں مسلسل نشانہ ٻݨاوݨ دی وی سخت مذمت کریندے۔ غزہ وچ بے گھر خانداناں کوں پناہ ڈیوݨ آلے سکول دے خلاف تازہ ترین قابل مذمت حملہ اسرائیل دی مسلسل استثنیٰ دی ہک مثال اے۔ انہاں آکھیا جو ایں حملے توں بعد دنیا دل دہلا ڈیوݨ آلیاں تصویراں ڈٹھن، ایں حملے اچ درجنّاں لوک ہلاک تھئے جنہاں وچوں بہوں سارے ٻال وی شامل ہن، جیندے تے عالمی برادری کوں جاگݨا چاہیدے۔ بیان وچ ٻیا آکھیا گیا جو اے حملے فوری طور تے ختم تھیوݨے چاہیدن اتے اسرائیل کوں اوندے گھناؤنے جرائم کیتے جوابدہ تھیوݨاں چاہیدے۔ پاکستان فلسطینی عوام دے حق خود ارادیت کیتے آپݨی غیر متزلزل حمایت دا اعادہ کریندے اتے 1967ء توں پہلے دی سرحداں تے مشتمل ہک آزاد، قابل عمل اتے متصل فلسطینی ریاست دے قیام دا مطالبہ کریندے جئیں دا دارالحکومت القدس الشریف ہووے۔