وزیراعظم شہباز شریف دی آذربائیجان دے صدر الہام علییوف نال ݙو طرفہ ملاقات

لاچین ۔27مئی (اے پی پی)وزیراعظم محمد شہباز شریف اَتے جمہوریہ آذربائیجان دے صدر الہام علییوف ݙوہاں ملکاں وچال سیاسی، اقتصادی، دفاعی اَتے ثقافتی تعاون تے اطمینان کریندے آپسی فائدے آلے شعبیاں اچ سرمایہ کاری دے ذریعے سٹریٹجک شراکت داری ودھاوݨ دا عزم دوہرائے۔ ݙوہاں رہنماواں علاقائی استحکام، آپسی خوشحالی اَتے کلیدی بین الاقوامی امور تے اصولی موقف تکڑا کرݨ کیتے مربوط کوششاں دی اہمیت تے زور ݙتے۔ وزیراعظم محمد شہباز شریف دی جمہوریہ آذربائیجان دے صدر الہام علییوف نال آذربائیجان دے لاچین شہر اچ ݙو طرفہ ملاقات تھئی۔ نائب وزیراعظم اَتے وزیر خارجہ سینیٹر محمد اسحاق ݙار، چیف آف دی آرمی سٹاف فیلڈ مارشل سید عاصم منیر، وفاقی وزیر اطلاعات و نشریات عطاء اللہ تارڑ اَتے وزیراعظم دے معاون خصوصی طارق فاطمی وی ملاقات اچ موجود ہن۔ ملاقات ݙوہاں رہنماواں اَتے ملکاں وچال ودھدے تعلقات دی عکاس اے۔ وزیراعظم آذربائیجان دے یوم آزادی دے موقع تے صدر علییوف اَتے آذربائیجان دے عوام کوں مبارکباد پیش کیتی۔ وزیراعظم آکھیا جو آذربائیجان دے عوام دا پاکستانی عوام نال لازوال رشتہ اے۔ وزیراعظم بھارت نال اڄوکے تنازعے اچن پاکستان دی غیر متزلزل حمایت تے آذربائیجان دے صدر الہام علییوف دا شکریہ ادا کیتا اَتے برادر ملک آذربائیجان دی قیادت اَتے عوام ولوں یکجہتی کوں سراہیا جو بھارت دے خلاف معرکہ حق اچ پاکستان دی کامیابیاں تے آذربائیجان اچ جشن منایا ڳیا ہا۔ ملاقات اچ ݙوہاں رہنماواں ݙو طرفہ تعلقات دے مکمل دائرہ کار دا جائزہ گھدا اَتے پاکستان اَتے آذربائیجان وچال سیاسی، اقتصادی، دفاعی اَتے ثقافتی تعاون تے اطمینان کیتا۔ انہاں آپسی فائدے آلے شعبیاں اچ سرمایہ کاری دے ذریعے سٹریٹجک شراکت داری کوں متنوع بݨاوݨ کیتے اپݨے سانجھے عزم دا اعادہ کیتا۔ وزیراعظم آکھیا جو ݙوہاں ملکاں ہمیشہ ہک ݙوجھے دا ساتھ ݙتے۔ ملاقات اچ آذربائیجان ولوں پاکستان اچ سرمایہ کاری دی پیشرفت دے حوالے نال وفداں دے تبادلے تے اتفاق کیتا ڳیا اتے اے وی طے پایا جو ݙوہاں ملکاں وچال وفداں دی سطح تے ملاقات بہوں جلدی کیتی ویسی۔ وزیراعظم آکھیا جو لاچین اچ اے اجلاس کراوݨ آذربائیجان دی استقامت اَتے بحالی دے سفر دی عکاسی کریندے جیڑھا ݙوہاں ملکاں کیتے ڳہری علامتی اَتے جذباتی اہمیت رکھیندے۔ ݙوہاں رہنماواں علاقائی استحکام، آپسی خوشحالی اَتے کلیدی بین الاقوامی امور تے اصولی موقف ودھاوݨ کیتے مربوط کوششاں دی اہمیت تے زور ݙتا۔ ملاقات دے چھیکڑ تے ݙوہاں رہنماواں پاکستان-آذربائیجان شراکت داری کوں ٻیا تکڑا کرݨ اَتے ݙو طرفہ علاقائی سطح تے سانجھے مقاصد کوں اڳوں ودھاوݨ کیتے رَل تے کم کرݨ دے عزم دا اعادہ کیتا۔