یوم تکبیر قوم دے عزم، استقلال اَتے دفاع وطن دے ناقابلِ تسخیر جذبے کوں نشابر کریندے، ایں تاریخی پندھ دا آغاز بانی ایٹمی پروگرام، شہید ذوالفقار علی بھٹو کیتا، چیئرمین سینیٹ سید یوسف رضا گیلانی

اسلام آباد۔28مئی (اے پی پی) چیئرمین سینیٹ سید یوسف رضا گیلانی آکھیا جو یوم تکبیر قوم دے عزم، استقلال اَتے دفاع وطن دے ناقابلِ تسخیر جذبے کوں نشابر کریندے، ایں تاریخی پندھ دا آغاز بانی ایٹمی پروگرام، شہید ذوالفقار علی بھٹو کیتا۔ سینیٹ سیکرٹریٹ میڈیا ڈائریکٹوریٹ ولوں بدھ کوں یوم تکبیر 28 مئی دے موقعے تے جاری آپݨے بیان اِچ آکھیا جو اے او ݙینھ اے جݙاں پاکستان دنیا دے سامݨے آپݨی خودمختاری اَتے سلامتی دے تحفظ کیتے ہِک جرات مندانہ فیصلہ کیتا، پاکستان ایٹمی قوت بݨ تے امتِ مسلمہ دا پہلا ایٹمی ملک بݨ ڳیا۔ چیئرمین سینیٹ سید یوسف رضا گیلانی آکھیا جو 28 مئی 1998 پاکستان دی دفاعی تاریخ دا سُنہرا ݙینھ اے جیڑھا اساکوں انہاں سارے عظیم رہنماواں دی یاد ݙویندے جنہاں پاکستان کوں ایٹمی قوت بݨاوݨ دا منڈھ بدھیا۔ سید یوسف رضا گیلانی آکھیا جو ایں تاریخی پندھ دا آغاز بانی ایٹمی پروگرام، شہید ذوالفقار علی بھٹو کیتا، ذوالفقار علی بھٹو دے ایں ویژن اَتے دور اندیشی پاکستان کوں او سمت عطا کیتی جئیں دا ثمر اساکوں 1998 وِچ مِلیا۔ چیئرمین سینیٹ شہید محترمہ بینظیر بھٹو کوں وی خراج عقیدت پیش کریندیں ہوئیں آکھیا جو محترمہ بینظیر بھٹو آپݨے پیو دے ایٹمی ویژن کوں نہ صرف برقرار رکھیا بلکہ بطور وزیر اعظم قومی ایٹمی پروگرام دی بھرپور سرپرستی کیتی۔ انہاں آکھیا جو یومِ تکبیر اساکوں یاد ݙویندے جو جݙاں قوم متحد تھیوے تاں او ہر چیلنج دا مقابلہ کر سڳدی اے۔ چیئرمین سینیٹ آکھیا جو پاکستان دا ایٹمی پروگرام ہِک دفاعی صلاحیت اے۔ چیئرمین سینیٹ آکھیا جو اساں امن دے داعی ہیسے پر کوئی وی جارحیت دا مُونہہ ٻھن جواب ݙیوݨ دی بھرپور صلاحیت رکھیندے ہیسے۔ چیئرمین سینیٹ سید یوسف رضا گیلانی آکھیا جو یومِ تکبیر تے اساں انہاں سارے شہداء، سائنسداناں، محب وطن رہنماواں اَتے افواجِ پاکستان کوں سلام پیش کریندوں۔