بھارتی وزیر اعظم دے اڄوکے ریمارکس تے وزارت خارجہ دا رد عمل

اسلام آباد۔28مئی (اے پی پی) وزارت خارجہ بھارتی وزیر اعظم دے اڄوکے ریمارکس تے تاسف دا اظہار کریندیں ہوئیں آکھیا جو اے امر ٻہوں افسوسناک اے حالانکہ مکمل طور تے غیر متوقع وی نئیں جو بھارتی وزیر اعظم ہِک واری ول تاریخی نظر ثانی دے جاری منصوبے کوں ہِک پاسے رکھ ݙتے تاجو اقلیتاں دے اندرونی جبر کوں ہِک ٻئی اشتعال انگیز یکجہتی ݙتی ونڄ سڳے۔ ترجمان دفتر خارجہ ولوں جاری پریس ریلیز موجب بھارتی وزیراعظم ولوں پاݨی کوں ہتھیار بݨاوݨ بارے انہاں دے بیانات ہِک مشترکہ معاہدے دی پابندی، بین الاقوامی اصولاں توں قابل افسوس انحراف ہن اَتے خطے اِچ بھارت دا طرز عمل عالمی عزائم توں واضح تضاد دی عکاسی کریندے۔ دفتر خارجہ آکھیا جو بین الاقوامی احترام دی پیروی کرݨ آلی حقیقی قیادت پہلے آپݨے اندر ݙیکھدی اے اَتے ݙوجھیاں کوں دھمکیاں ݙیوݨ توں پہلے آپݨے ضمیر کوں مطمئن کرݨ دی کوشش کریندی اے۔ دفتر خارجہ ٻیا آکھیا جو بھارتی حکومت دا تعلق ماورائے عدالت قتل اَتے غیر ملکی بغاوت نال جُڑیا ہوئے، بھارت غیر ملکی عوام اَتے علاقیاں تے قابض اے۔ غیر قانونی طور تے بھارتی مقبوضہ جموں تے کشمیر اچ بھارت دا ریکارڈ ہمیشہ توں ہی منظم جبر تے مبنی اے، ستم ظریفی اے جو ہِک ایہو سویں ریاست ہݨ مظلومیت دی چادر اوڑھݨ دی کوشش کریندی پئی ہے۔ بھارت دی اڄوکی حکومت دے نظریاتی کارکناں گروہی تشدد کوں معمول بݨا ڳھدے، نفرت انگیز مہماں کوں فروغ ݙتے اَتے ہمیشہ مذہبی اقلیتاں کوں نشانہ بݨائے۔ ایجھی کارروائیاں کہیں ملک دی اندرونی سیاست کوں تاں فروغ ݙے سڳدن لیکن بین الاقوامی صورتحال دا مقابلہ نئیں کر سڳدیاں اَتے نہ ای عالمی برادری ہِک ذمہ وار علاقائی طاقت دے طور تے بھارت تے اعتماد کر سڳدی اے۔ پاکستان بھارت تے زور ݙتا جو او بین الاقوامی نظام دے بنیادی اصولاں آلے پاسے واپس آوے جئیں اِچ ݙوجھیاں دے خود مختار حقوق اَتے معاہدے دی ذمہ واریاں دے احترام دے نال نال زبان اَتے عمل ݙوہاں اِچ تحمل شامل ہن۔ انتخابی مہم تے تاڑیاں ماری ونڄ سڳدین لیکن ایہہ طویل مدتی امن اَتے استحکام کوں نقصان ݙیندن۔ بھارتی نویں نسل جیڑھی اکثر انتہا پسند قوم پرستی دا پہلا شکار ہوندے ہن انہاں کوں چاہیدے جو خوف دی سیاست کوں رد کر ݙیون اَتے ایں دی بجائے بھارتی نویں نسل کیتے بہتر ہوسی جو وقار اَتے علاقائی تعاون تے مبنی مستقبل کیتے کم کرے۔