پاکستان دا دفاع مضبوط ہتھاں وِچ اے، قوم کوں آپݨیاں افواج، سائنسداناں اَتے سیاسی قیادت تے پورا اعتماد اے، وفاقی وزیر اطلاعات عطاء اللہ تارڑ دا یوم تکبیر تے سنیھا

اسلام آباد۔28مئی (اے پی پی) وفاقی وزیر اطلاعات تے نشریات عطاء اللہ تارڑ آکھیا جو یومِ تکبیر ایں عہد دی تجدید دا ݙینھ اے جو اساں کوئی وی جارحیت دا مُونہہ ٻھن جواب ݙیسوں اَتے ملکی سلامتی تے خودمختاری تے کوئی سمجھوتہ نہ کریسوں، پاکستان دا دفاع مضبوط ہتھاں وِچ اے، قوم کوں آپݨیاں افواج، سائنسداناں اَتے سیاسی قیادت تے مکمل اعتماد اے۔ یوم تکبیر دے موقعے تے آپݨے سنیھے اِچ قوم کوں مبارکخ ݙیندیں ہوئیں وفاقی وزیر اطلاعات عطاء اللہ تارڑ آکھیا جو 28 مئی 1998ء دا ݙینھ پاکستان دی تاریخ وِچ ہِک اہم سنگ میل دی حیثیت رکھیندے، ایں ݙینھ قوم نواز شریف دی قیادت اِچ بھارت دے پنج ایٹمی دھماکیاں دے جواب وِچ چھی کامیاب ایٹمی دھماکے کرتے ملک دے دفاع کوں ناقابل تسخیر بݨایا۔ یومِ تکبیر نہ صرف پاکستان دی سائنسی، عسکری اَتے سیاسی قیادت دے عزم تے استقلال دا مظہر اے بلکہ اے ݙینھ ایں گالھ دی وی علامت اے جو جݙاں وی مادرِ وطن کوں چیلنج درپیش آیا، قوم ہِک جان تھی تے دشمن کوں مُونہہ ٻھن جواب ݙیوݨ کیتے صف آراء تھئی۔ وفاقی وزیر اطلاعات عطاء اللہ تارڑ آکھیا جو اڄ ہِک واری ول پاکستان ثابت کر ݙتے جو دفاعِ وطن کیتے اساں ہر حد تئیں ونڄ سڳدوں۔ انہاں آکھیا جو اڄوکی پاک بھارت جنگ اچ وزیر اعظم محمد شہباز شریف دی قیادت اِچ پاکستان دشمن دے عزائم خاک اچ ملائے، 1998ء وِچ نواز شریف دی قیادت اِچ بھارت دے پنج ایٹمی دھماکیاں دے جواب اِچ چھی ایٹمی دھماکے کیتے اَتے ہݨ وزیراعظم شہباز شریف دی قیادت اِچ پاکستان بھارت دے طیارے کامیابی نال مار تے ڈھائن۔ اے کامیابی ایں تسلسل دا حصہ اے جیڑھا 1998ء اچ شروع تھیا ہئی اَتے اڄ وی پوری قوت دے نال جاری اے۔ وزیر اطلاعات آکھیا جو پاکستان دا دفاع مضبوط ہتھاں اِچ اے، قوم کوں آپݨیاں افواج، سائنسداناں اَتے سیاسی قیادت تے مکمل اعتماد اے۔ انہاں آکھیا جو یومِ تکبیر ایں عہد دی تجدید دا ݙینھ اے جو اساں کوئی وی جارحیت دا مُونہہ ٻھن جواب ݙیسوں اَتے ملکی سلامتی تے خودمختاری تے کوئی سمجھوتہ نہ کریسوں۔