وزیراعظم شہباز شریف دا ملک دے دفاع کوں ناقابل تسخیر بݨاوݨ تے قائدین، سائنسداناں، انجینئرز اَتے بہادر مسلح افواج کوں خراج تحسین

اسلام آباد۔28مئی (اے پی پی) وزیراعظم محمد شہباز شریف یوم تکبیر دے موقع تے قوم دے نال رل تے سابق وزرائے اعظم، سائنسداناں، انجینئرز اَتے بہادر مسلح افواج کوں خراج تحسین پیش کیتے جنہاں ملک دے دفاع کوں ناقابل تسخیر بݨایا۔ بدھ کوں سوشل میڈیا ایکس تے آپݨی پوسٹ اچ وزیراعظم آکھیا جو جݙاں قوم یوم تکبیر منیندی پئی اے، اساں اللہ تعالیٰ دیاں بے شمار نعمتاں دا شکر ادا کریندوں، اللہ تعالیٰ اساکوں حالیہ بھارتی جارحیت دے مقابلے اچ ہک ٻئی شاندار فتح نال نوازیا۔ انہاں آکھیا جو اوں ویلھے دے وزیراعظم نواز شریف کئی طاقتور ملکاں دی شدید مخالفت دے باوجود 1998 اچ اپݨے جرأت مندانہ فیصلے نال پاکستان دے دفاع کوں ناقابل تسخیر بݨا ݙتا ہئی، ایں طرحاں ایں تاریخی فیصلے نال پاکستان کوں ایٹمی طاقت دا درجہ حاصل تھیا۔ انہاں ٻیا آکھیا جو میں شہید ذوالفقار علی بھٹو کوں انہاں دی دور اندیش قیادت تے خراج تحسین پیش کرݨ اچ قوم دے نال شامل ہاں، اساں آپݨے سائنسداناں اَتے انجینئرز کوں وی شاندار خراج تحسین پیش کریندوں جنہاں پوری قوم دے وژن اَتے امنگاں کوں حقیقت اچ بدل ݙتا۔ وزیراعظم ٻیا آکھیا جو او سارے ٻاہرلے اَتے اندرلے خطرات دے خلاف قوم دیاں سرحداں دے دفاع دے غیر متزلزل عزم تے آپݨی بہادر مسلح افواج دی تعریف کریندن۔ وزیراعظم آکھیا جو اتحاد اَتے عزم دے ایں جذبے نال اساں پاکستان کوں ہک مضبوط معاشی طاقت بݨاوݨ دا عہد کریندوں۔