اقوام متحدہ دی امن فوج دے دستے بین الاقوامی امن اتے سلامتی برقرار رکھݨ کیتے دنیا دے کئی حصیاں اچ لگن تے حوصلے دے نال خدمات سرانجام ݙیندے پئن ، نائب وزیراعظم تے وزیر خارجہ اسحاق ڈار دا سنیھا

اسلام آباد۔29 مئی (اے پی پی) نائب وزیراعظم اتے وزیر خارجہ سینٹر محمد اسحاق ڈار آکھیا جو اقوام متحدہ دی امن فوج دے دستے بین الاقوامی امن اتے سلامتی برقرار رکھݨ کیتے دنیا دے کئی حصیاں اچ لگن تے حوصلے دے نال خدمات سرانجام ݙیندے پئن ، پاکستان اقوام متحدہ دے امن دستیاں دے عالمی ڈینہہ دے موقع تے اقوام متحدہ دے امن دستیاں دی لگن، حوصلے اتے خدمات کوں تسلیم کرݨ کیتے بین الاقوامی برادری دے نال شامل اے ۔نائب وزیراعظم اتے وزیر خارجہ اے ڳالھیں بدھ کوں اقوام متحدہ دے امن دستیاں دے عالمی ڈینہہ دے موقع تے آپݨے سنیھے اچ آکھی ۔انہاں آکھیا جو اے ڈینہہ اقوام متحدہ دی امن فوج اچ شامل وݙی تعداد اچ اہلکاراں ولوں آپݨی ڈیوٹی اچ ݙتی ڳئی جاناں دی قربانی کوں خراج عقیدت پیش کرݨ کیتے وی ہک اہم یاد دہانی اے جنہاں اچ پاکستان دے 181 بہادر امن فوجی وی شامل ہن ۔ نائب وزیراعظم آکھیا جو سالاں دے دوران پاکستان اقوام متحدہ دے امن مشناں کیتے فوجی تعاون کرݨ آلا ہک سرکردہ ملک رہیے، امن فوج اچ ݙو لکھ 35 ہزار توں ودھ پاکستانی مرد اتے تریمتیں اہلکار دنیا دے کئی حصیاں اچ امتیاز دے نال خدمات سرانجام ݙے چکین اتے ݙیندے پئن ۔ انہاں آکھیا جو پاکستان اقوام متحدہ دے قدیم ترین امن مشن اچوں ہک اقوام متحدہ دے ملٹری آبزرور گروپ ان انڈیا اینڈ پاکستان (یو این ایم او جی آئی پی) دا میزبان وی اے ۔نائب وزیراعظم سینٹر محمد اسحاق ڈار آکھیا جو خطے اچ اڄوکی پیش رفت اقوام متحدہ دی سلامتی کونسل دیاں متعلقہ قرارداداں اتے کشمیری عوام دیاں امنگاں دے مطابق تنازعہ جموں تے کشمیر دے منصفانہ حل دے نال نال (یو این ایم او جی آئی پی) دی موجودگی اتے کردار کوں ٻیا مضبوط کرݨ دی لوڑھ کوں تقویت ݙیندی اے ۔ انہاں آکھیا جو ہک ایجھے ویلھے اچ جݙاں دنیا کوں کثیر جہتی خطرات دا سامݨا اے، اقوام متحدہ دی امن فوج بین الاقوامی امن اتے سلامتی برقرار رکھݨ کیتے ساریں توں ودھ قابل اعتماد اتے موثر اے ۔انہاں آکھیا جو بین الاقوامی برادری ولوں ایں ڈینہہ دی یاد دے موقع تے اقوام متحدہ دی امن فوج کوں عصری اتے مستقبل دے چیلنجز بشمول تکنیکی جدت طرازی اتے علاقائی شراکت داری کوں مضبوط کرݨ ، ایندے نال نبڑݨ کیتے سیاسی عزم دی تجدید دی لوڑھ اے ۔ نائب وزیراعظم آکھیا جو پاکستان اتے جمہوریہ کوریا 15 توں 16 اپریل کوں اسلام آباد اچ اقوام متحدہ دے امن مشن دی وزارتی تاریخ دے تریجھے اجلاس دی “محفوظ تے ودھ موثر امن قائم کرݨ دی ول: ٹیکنالوجی دا استعمال اتے مربوط نقطہ نظر” دے موضوع دے تحت سانجھی میزبانی کیتی ۔اجلاس دے نتائج ایں مقصد دے حصول دے اقدامات دی رفتار تکھے کرݨ اچ مددگار ثابت تھئن ۔ انہاں آکھیا جو پاکستان ہک پرامن، مستحکم اتے خوشحال دنیا کیتے اقوام متحدہ دے امن مشن کیتے اپݨے مضبوط عزم کوں برقرار رکھیندے اتے رکھیسی ۔