اقوام متحدہ دے امن مشنز کوں ٻیا مضبوط بݨاوݨ کیتے پاکستان دا عزم تے حمایت دا اعادہ، وزیراعظم شہباز شریف

اسلام آباد۔29 مئی (اے پی پی) وزیراعظم محمد شہباز شریف اقوام متحدہ دے امن مشنز کوں ٻیا مضبوط بݨاوݨ دی کوششاں اچ پاکستان دے عزم اتے حمایت دا اعادہ کریندیں ہوئیں آکھیا جو جنوبی ایشیاء اچ اڄوکے واقعات اقوام متحدہ دی سلامتی کونسل دی قرارداداں اتے کشمیری عوام دیاں امنگاں دے مطابق مسئلہ کشمیر دے منصفانہ حل کوں یقینی بݨاوݨ اتے اقوام متحدہ دے پاکستان تے بھارت اچ ملٹری آبزرور گروپ دے کردار اتے موجودگی کوں مضبوط کرݨ دی لوڑھ کوں اجاگر کیتے ۔وزیراعظم آفس دے میڈیا ونگ ولوں جاری بیان موجب اقوام متحدہ دے امن دستیاں دے عالمی ڈینہہ تے اپݨے سنیھے اچ وزیراعظم آکھیا جو اساں اڄ عالمی برادری دے نال رَل تے اقوام متحدہ دے امن دستیاں دا عالمی ڈینہہ منیندے پئیوں ۔ اے ڈینہہ نہ صرف اقوام متحدہ دے امن دستیاں ولوں بین الاقوامی امن تے سلامتی کیتے ݙتی ڳئی لاتعداد قربانیاں دی ہک یاد دہانی اے بلکہ ہک پرامن، مستحکم اتے خوشحال دنیا کیتے انہاں امن دستیاں دے اہم کردار دا اعتراف اے ۔ انہاں آکھیا جو اقوام متحدہ دے امن مشن دی ست ݙھاکیاں تے محیط تاریخ اچ 2 لکھ 35 ہزار توں ودھ پاکستانی امن دستیاں پوری دنیا اچ اقوام متحدہ دے 48 مشناں اچ امتیازی خدمات سرانجام ݙتن ۔ 181 پاکستانی امن فوجیاں بین الاقوامی امن تے سلامتی دے حصول اچ آپݨیاں جاناں دیاں لازوال قربانیاں ݙتن ۔ وزیراعظم آکھیا جو اے ڈینہہ اقوام متحدہ دی امن فوج کوں پیش بہت سارے چیلنجز جینویں جو ودھدی ہوئی یکطرفہ پالیسیاں ، مالی پابندیاں، اقوام متحدہ دے امن دستیاں دی حفاظت تے سلامتی کیتے ودھدے ہوئے خطرات، غلط معلومات دی بنیاد تے اقوام متحدہ دیاں امن کارروائیاں کوں نشانہ بݨاوݨ، اتے نویاں تے ابھردیاں ہویاں ٹیکنالوجیز دے غیر مستحکم اثرات وغیرہ دا جائزہ گھنݨ دا مناسب موقع اے ۔ وزیراعظم آکھیا جو اڄ دے ڈینہہ ، میں بین الاقوامی برادری توں مطالبہ کرینداں جو او بین الاقوامی امن تے سلامتی برقرار رکھݨ کیتے اقوام متحدہ دی کامیاب پالیسیاں کیتے آپݨی وابستگی دا اعادہ کرے، اتے اقوام متحدہ دی امن فوج کوں ابھردے ہوئے چیلنجز دے مطابق ڈھالݨ دی کوششاں ودھائی ونجن ۔وزیراعظم یاد ݙیوایا جو انہاں چیلنجز کوں حل کرݨ دی کوششاں اچ پاکستان جمہوریہ کوریا دے نال رَل تے 16 ۔ 15 اپریل 2025 کوں اسلام آباد اچ اقوام متحدہ دے امن مشن دے وزارتی اجلاس دی سانجھی میزبانی کیتی جئیں دا موضوع “ہک محفوظ تے ودھ موثر امن ول : ٹیکنالوجی دا استعمال اتے مربوط نقطہ نظر” ہئی۔ انہاں آکھیا جو پاکستان، بھارت اتے پاکستان اچ اقوام متحدہ دے فوجی مبصر گروپ (UNMOGIP) دی میزبانی وی کریندے، جو اقوام متحدہ دے ساریں توں پراݨے امن مشناں اچوں ہک اے، جیں کوں جموں و کشمیر دے اقوام متحدہ دے تسلیم شدہ متنازعہ علاقے اچ لائن آف کنٹرول دے نال جنگ بندی دی نگرانی دا کم ݙتا ڳئے ۔ جنوبی ایشیاء اچ اڄوکے واقعات اقوام متحدہ دی سلامتی کونسل دی قرارداداں اتے کشمیری عوام دیاں امنگاں دے مطابق جموں تے کشمیر تنازعہ دے منصفانہ حل کوں یقینی بݨاوݨ اتے UNMOGIP دے کردار اتے موجودگی کوں مضبوط کرݨ دی لوڑھ کوں اجاگر کیتے ۔ ہک فوجی تعاون کرݨ آلا سرکردہ ملک اتے اقوام متحدہ دے سلامتی کونسل دے غیر مستقل رکن دے طور تے، میں اج اقوام متحدہ دے امن مشناں کوں ٻیا مضبوط بݨاوݨ کیتے ساریاں کوششاں اچ پاکستان دے عزم اتے حمایت دا اعادہ کرینداں۔