پاکستان “اُڑان پاکستان” دے تحت وسطی تے جنوبی ایشیا کیتے ہِک وݙا تجارتی مرکز بݨݨ کیتے پُرعزم اے۔ پروفیسر احسن اقبال

اسلام آباد۔ 29 مئی (اے پی پی) وفاقی وزیر منصوبہ بندی، ترقی تے خصوصی اقدامات پروفیسر احسن اقبال آکھیا جو پاکستان “اُڑان پاکستان” وژن دے تحت پائیدار ترقی، علاقائی روابط، ڈیجیٹل تجارت اَتے ساوݨی توانائی دے ودھارے دے ذریعے وسطی تے جنوبی ایشیا کیتے ہِک وݙا تجارتی اَتے لاجسٹک مرکز بݨݨ کیتے پُرعزم اِے۔ او خمیس کوں کاریک اسلام آباد دے ہک مقامی ہوٹل اچ تھیوݨ والی پنجویں سی آر ای سی انسٹیٹیوٹ سالانہ تحقیقی کانفرنس توں خطاب کریندے پئے ہن۔ کانفرنس دا موضوع “کاریک کنیکٹیویٹی: تجارت اَتے تجارتی سہولت دا ودھارا” ہئی، جئیں وِچ ایشیائی ترقیاتی بینک (اے ڈی بی)، کاریک انسٹیٹیوٹ، پاکستان انسٹیٹیوٹ آف ڈویلپمنٹ اکنامکس (پائیڈ)، اَتے یونیورسٹی آف سرگودھا دے شراکت نال نمائندے، ماہرینِ معیشت، سکالرز اَتے پالیسی سازاں شرکت کیتی۔پروفیسر احسن اقبال آکھیا جو اڄ دا دور “علاقائی حقیقت پسندی” دا اِے، جِتھاں دنیا کوں موسمیاتی تبدیلی، جغرافیائی سیاسی تناؤ اَتے ٹیکنالوجی وِچ انقلاب سویں چیلنجز دا سامݨا ہِے۔ ایہو جیہی صورتحال وِچ وسطی ایشیائی علاقائی اقتصادی تعاون ملکاں کوں آپݨی آپسی تجارت اَتے تعاون کوں ودھاوݨا پوسی۔ وفاقی وزیر توجہ ݙیوائی جو کاریک ملکاں (چین توں علاوہ) وچال آپسی تجارت صرف 7 فیصد اِے، جݙاں جو آسیان ملکاں وِچ اے شرح 22 فیصد توں ودھ ہِے۔ اُنہاں آکھیا جو اے ڳھٹکی جغرافیہ دی نئیں، بلکہ ادارہ جاتی ہم آہنگی دی ڳھٹکی، خراب لاجسٹکس اَتے غیر مربوط ضوابط پاروں اے۔ انہاں معروف معیشت دان پال کولیئر دا حوالہ ݙیندیں ہوئیں آکھیا جو اُڑان پاکستان – ترقی دا نواں وژن اِے۔ انہاں “اُڑان پاکستان” دے پنج ستوناں تے تفصیل نال روشنی پاتی جئیں اچ برآمدات، ترقی دا انجن، مساوات اَتے بااختیاری، سارے طبقیاں دی شمولیت، ای-پاکستان، ڈیجیٹل انقلاب دا ودھارا، ماحولیات، خوراک، پاݨی اَتے موسمیاتی تحفظ اَتے توانائی تے انفراسٹرکچر و صنعتی ترقی دا ایندھن شامل ہن۔انہاں آکھیا جو پاکستان دی آئی ٹی برآمدات 3.5 ارب ڈالر توں ودھ ڳئِن اَتے سالانہ 20 فیصد دی شرح نال ودھدی پئن ، جݙاں جو 2.2 ملین نینگراں کوں ڈیجیٹل مہارتاں دی تربیت ݙتی ڳئی اِے۔ وفاقی وزیر پاکستان سنگل ونڈو دا ذکر کریندیں ہوئیں ݙسایا جو کسٹمز کلیرنس دا ویلھا اَٹھ ݙینہاں توں گھٹ تے صرف 48 گھنٹے رہ ڳئِے، اَتے ہݨ اینکوں وسطی ایشیائی راہداریاں نال جوڑیا ویندا پئِے تاں جو پورے کاریک خطے وِچ ڈیجیٹل تجارت کوں ودھایا ونڄ سڳے۔ٹی آئی اے کنونشن دے تحت پاکستان چین، وسطی ایشیا اَتے مشرق وسطیٰ وچال سینکڑاں ٹرکاں دی بین الاقوامی نقل و حمل کوں ممکن بݨائِے، جئیں نال لاگت وِچ 30 فیصد اَتے ویلھے وِچ 50 فیصد تئیں ڳھٹکی آئی اے۔ انہاں واضح کیتا ہِے جو چین-پاکستان اقتصادی راہداری ہِک علاقائی اثاثہ اِے، جئیں دے ذریعے 3,000 کلومیٹر توں ودھ سڑکاں تعمیر تھی ڳئِن، 11 گیگا واٹ بجلی شامل کیتی ڳئی اِے اَتے گوادر بندرگاہ کوں ہِک علاقائی گیٹ وے بݨایا ویندا پئے۔ انہاں آکھیا جو سی پیک دا ݙوجھا مرحلہ صنعتی تعاون اَتے خصوصی اقتصادی زونز تے مبنی ہِے، جئیں وِچ کاریک ملکاں کوں پاکستان دی ویلیو چینز وِچ شامل تھیوݨ اَتے عالمی منڈی تئیں رسائی حاصل کرݨ دی دعوت ݙتی ڳئی۔وفاقی وزیر توانائی کوں خطے دی ترقی دی “ریڑھ دی ہݙی” قرار ݙیندیں ہوئیں ݙسایا ہِے جو کاسا-100 سویں منصوبے پاکستان، افغانستان، کرغزستان اَتے تاجکستان کوں جوڑیندے پئن۔ انہاں کاریک گرین انرجی کوریڈور دے قیام دی تجویز ݙتی تاں جو شمالی توانائی پیدا کرݨ آلے ملکاں کوں جنوبی صارفین نال جوڑیا ونڄ سڳے۔ انہاں زور ݙتا جو ڈیجیٹل معیشت دی اہمیت ہݨ تجارت جِتنی تھی ڳئی اے۔ ای-پاکستان دے تحت، سرکاری خدمتاں کوں ڈیجیٹل بݨایا ویندا پئے، فری لانسرز 2024 وِچ 1 ارب ڈالر توں ودھ دی آمدنی حاصل کیتی، ریگولیٹری سینڈ باکس اَتے سٹارٹ اپ انوویشن دی حوصلہ افزائی کیتی ویندی پئی اِے۔ انہاں کاریک ڈیجیٹل ٹریڈ کوریڈور دی تجویز وی ݙتی، جیڑھا سمارٹ لاجسٹکس، ای-کسٹمز اَتے ڈیجیٹل سرٹیفیکیشن تے مبنی ہوسی۔ ڈاکٹر قیصر عباس وفاقی وزیر منصوبہ بندی پروفیسر احسن اقبال دے خطاب دا حوالہ ݙیندیں ہوئیں آکھیا جو پاکستان ہݨ صرف ہِک جغرافیائی راستہ نئیں، بلکہ ہِک فعال علاقائی حب دے طور تے ابھریندا پئے۔ انہاں آکھیا جو پاکستان دا ’اُڑان وژن‘ ہِک سادہ پالیسی نئیں بلکہ ہِک ہمہ جہت فریم ورک ہِے، جیڑھا برآمدات، مساوات، ڈیجیٹل انقلاب، ماحولیات اَتے توانائی کوں ہک ڄاہ کریندِے۔